Isumalioqatigiissitap suliassat allattorsimaffiat malippaa

Saammaateqatigiinnissamut Isumalioqatigiissitap allattoqarfiata sermitsiaq.ag-miit saqqummiunneqartoq, isumalioqatigiissitaq nammineq inatsisini akerlerisaanik sulisoq pillugu, erseqqissarpaa isumalioqatigiissitap sulinerminni sinaakkutissiaat suliassaasa nassuiaataanni allaqqasut malikkai.

 

”Isumalioqatigiissitaq pilersinneqarmat nalinginnaasunik tallimanik ilaasortaqarpoq, taakkunani ilaasortani sisamat Kalaallit Nunaanni najugaqartuupput ataaserlu Qallunaat Nunaanni najugaqartuulluni.

 

Naluneqanngitsutut ilaasortat pingasut tunuarnikuupput aammalu ilaasortassanik nutaanik suli toqqaasoqarnikuunani. Taanna utaqqiisaagallartumik pisuuvoq, piffissami qaninnermi aaqqinneqartussaq inuit tulluartut nassaarineqariarpata. Ilaasortassanik nutaanik taasisoqalerpat inatsisit atuuttut suliassat allassimaffianni erseqqissarneqarsimasut malinneqassapput, soorlu aamma inatsisit allat piumasaqaataasut malinneqartussat assigalugit pissaaq soorlu suiaassutsit oqimaaqatigiimmik agguarneqarsimasussat.

 

Maannakkut Saammaateqatigiinnissamut Isumalioqatigiissitaq Kalaallit Nunaata avannaani angalaarpoq, ataatsimiinnerit innuttaasunillu oqaluttuartitsinerit arlariit naammassereerlugit, aammali suli sapaatip akunneri marluk tulliuttut taamatut ingerlassaaq. Oqaluttuat isummallu arlariit pingaarutillit inuusuttuniit utoqqarniillu oqaluttuarineqartut katersorneqareerput," taama oqarpoq allattoqarfiup pisortaa Mari Kleist.

 

Attavigiuk:

Saammaateqatigiinnissamut Isumalioqatigiissitap allattoqarfia

Mari Kleist

marh@nanoq.gl

oqarasuaat: 53 78 28 

 

Nittartagaq una iserfigiuk saammaatta.gl imaluunniit Facebook aqqutigalugu qupperneq “Saammaateqatigiinnissaq”.