Qujaukitsoq Issittumi Ministerit Alaskami ataatsimiinneranni

Alaskami Anchoragemi USA-p Issittumi Ministerinik ataatsimiititsinerani Kalaallit Nunaat peqataavoq

30.-31. august 2015 Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq, ullumi danskit nunanut allanut ministeriat Kristian Jensen peqatigalugu Alaskami Anchoragemi Issittumi Ministerit ataatsimiinneranni peqataavoq. Peqataanissaq Danmarkip aamma Kalaallit Nunaata ataatsimoorlutik piareersarpaat.

Issittumi silap pissusaata allanngoriartornera aammalu tamanna Kalaallit Nunaannut qanoq sunniuteqarnersoq pillugu Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq ataatsimiinnerup nalaani nunanut allanut ministerinut qaaqqusanut saqqummiussivoq.

Saqqummiussinermini Vittus Qujaukitsoq nassuiaavoq ukiuni makkunani silap pissusaata allanngoriartornera qanoq Kalaallit Nunaanni piniartunut aalisartunullu atugassarititaasunik allannguinersoq  aammattaarlu erseqqissarlugu ilisimatusarnermi suliniutit Kalaallit Nunaanni ingerlanneqartut, silap pissusaata allanngoriartornera aammalu sermersuup aakkiartuaarnera ilutigalugu unammilligassat siunissami nunarsuarmi nalaanneqartartussat pillugit ilisimanninnerulernissamut paasisimasaqarnerulernissamullu iluaqutaasinnaanerata pingaaruteqarnera.

Anchoragemi, Alaskamiittumi Kristian Jensen aamma Vittus Qujaukitsoq aamma siunissami inuussutissarsiorneq, avammut tuniniaasarnissaq aamma niuernikkut suleqatigiinnissaq, 2016-imi Koreami kujallermi inuussutissarsiornikkut saqqummiinermik inerneqartussatut naatsorsuutigineqartoq, pillugu Koreami kujallermi nunanut allanut ministerit suleqatigiit pingasut akornanni ataatsimeeqatiginissaanut periarfissaqarput.

Ministerit ataatsimeereernerisa kingorna Vittus Qujaukitsoq oqarpoq:

”Anchoragemi Alaskamiittumi Ministerit ataatsimiinneranni, USA-mi præsidentip Obamap qaaqqusisuuffigisaanut, Kunngeqarfik Danmarkip peqataanera, danskit nunanut allanut ministeriata uangalu akornatsinni qanimut ataqatigiissaarinikkut pisimanera, uannut pingaaruteqarpoq.

Qaammatip aallartinnerani Nuummi ataatsimeeqatigiinnitsinni, peqataanissatsinnut suliaqarfissavut ataatsimoorfiusussat nukittuumik ataatsimoorluta piareersarpavut, aammalu nunanut allanut ministerinut qaaqqusaasunut saqqummiinissavut ataqatigiissaarlugit.

Anchoragemi Ministerit ataatsimiinneranni peqataanitsinni, aamma Koreap kujalliup nunanut allanut ministeriata Yun Byung-se-p suleqatigiit pingasut akornanni sunniuteqarluartumik ataatsimeeqatiginissaa iluatsimmat, naammagisimaartorujussuuara. Ataatsimeeqatigiinnermi ilaatigut Korea kujallermi niuerfimmut pingaaruteqartumut aalisakkanut tunisassianut Kalaallit Nunaanneersunut pitsaanerusumik tunitsivissaqarnissaq, 2016-imi Koreami kujallermi inuussutissarsiornikkut saqqummiinermik ingerlatsinissaq, kiisalu Koreap kujalliup aamma Kalaallit Nunaata akornanni suleqatigiinnerup taagorneqartup ”Korea Polar Research Institute” annertusarneqarnissaa oqallisigineqarput."

Sisamanngorneq ulloq 27. august danskit nunanut allanut ministereqarfiata ambassadøriinut saqqummiisutut peqataavoq. Danskit ambassadøriititaannut saqqummiinissamut Kalaallit Nunaanni Naalakkersuisumik qaaqqusinerit taanna siullersaraat. Saqqummiineq pingaartumik inuussutissarsiornermut niuernermullu periarfissat pillugit nunanik allanik suleqateqarnissamut periarfissaqarnerulernissamik aallussiffiusoq, ambassadørinit neriulluarnartumik tigulluarneqarpoq.

Ataatsimeeqatigiinnerup nuannersup taassuma kingorna Kalaallit Nunaat aamma siunissami ukiumoortumik Danmarkit ambassadøriinik ataatsimiititsisarnerni ministerit akornanni peqataanissamut qaaqqusissummik tigusaqartassasoq, siunnerfigineqarpoq.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup oqalugiaataa (tuluttut)

 

Paasisaqarnerorusuttut attavigisinnaavaat 
Nunanut Allanut Pisortaqarfimmi pisortaq Kai Holst Andersen oqarasuaammut: +299 55 33 31, imaluunniit 
Silap pissusaanut immikkut ilisimasalik Pernille Bengtsen oqarasuaammi +45 31 79 78 81