Pisinnaatitaaffiit ataqqineqassapput

Inuit Ataqatigiit siulittaasuata Sara Olsvigip Naalakkersuisut Nuuk TV-mi nutaarsiassani ippassaq isornartorsiorpai Pituffimmi isumaqatigiissummik Namminersorlutik Oqartussat suliaqarsimanerannik eqqartuussissuserisup misissuinerata saqqummiunneqarnissaanik pilaarussinerarlugit.
Naalakkersuisut Siulittaasuata Kim Kielsenip taarsiullugu paaseqquaa misissuinermi apersorneqartut Inatsisartunilu ilaasortat kalaallisuinnaq oqaaseqartut pisinnaatitaaffiisa ataqqineqarnissaat pingaaruteqarmat:
”Eqqartuussissuserisup nassuiaataa misissuinermi apersorneqartunut tusarniutigineqaqqaartussaasimavoq. Apersorneqartut allatulli pisinnaatitaaffeqarput. Pisinnaatitaaffiit taakku ataqqineqartussaapput.
Inatsisartunut ilaasortat kalaallisuinnaq oqaaseqartut pisinnaatitaaffii aamma ataqqineqartussaapput. Eqqartuussissuserisup nassuiaataa 200-ut sinnerlugit qupperneqartoq kalaallisuunngortinneqartussaavoq, tamannalu piffissartorpoq.
Tusarniaaneq nutserinerlu piffissartorput.
Eqqartuussissuserisup nassuiaataani isumannaallisaanermut nunanullu allanut politikkimut tunngasut aamma nalilersoqqaarneqartussaapput nalunaarutip saqqummiutinnginnerani. Inuit Ataqatigiit tamanna ilisimavaat tamatuminngalu paasinninnertik oqariartuutiginikuullugu.
Naalakkersuisut nassuiaat tuaviortumik saqqummiunnianngilaat Inatsisartuni danskisuullaqqissut iluarisimaarinninnissaat piinnarlugu taamaalillutillu kalaallisuinnaq oqaaseqartut immikkoortillugit. Inatsisartuni oqaatsitigut suleriuserineqartut allanngortinneqarnissaat Inuit Ataqatigiit kissaatigisimanavianngilaat?
Naalakkersuisut nassuiaammik suli saqqummiussinnginnerat imaanngilaq suleqatikkuminaanniarlutik matoqqasumillu ingerlatsiniarlutik aalajangernerigaat. Soorlu naalakkersuisooqatigiinnissamut isumaqatigiissutitsinni allassimasoq ammasuunissaq suleqatigiinnissarlu kissaatigaarput. Taamaattorli suliami matumani pisinnaatitaaffiit, nunatsinni oqaatsitigut inissisimanerput kiisalu isumannaallisaanikkut nunanullu allanut politikkimut tunngasut ataqqisariaqarpavut.”

Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist, oqarasuaat +299 34 50 00 imaluunniit e-mail paok@nanoq.gl.