Sermiligaap eqqaani nutaamik uuliakoortoqarsimasinnaavoq

Ippassaq suli allamik, tamatumuuna Tasiilap avannamut kangiani Sermiligaap kangerluani, uuliakoortoqarsimasinnaanerata nalunaarutigineqareernerata kingorna Tunumi Sermiligaap eqqaani ujaasineq ingerlanneqarpoq. Kikkut tamarmik sumiiffimmi tassani angalaartut alaatsinaaqqullugit aammalu uuliamik mingutsitsinermik takusaqarunik upalungaarsimasunut nalunaaruteqaqqullugit, kaammattorneqarput.

Uulia takuneqarsimasoq suli nassaareqqinneqanngilaq

Innuttaasup Sermiligaap kangerluani uuliakoornerusinnaasoq marlunngormat takusimavaa. Tamatuma kingorna uuliamik mingutsitsinerusimasinnaasup taassuma nassaareqqinneqarnissaa ajornarsimavoq, taamaattumillu kuutsitsisimaneq uppernarsineqanngilaq. Taamatullu uuliap suussusaa imaluunniit kuutsitsisimanerup annertussusaa ilisimaneqanngillat.

Tamatuma kingorna umiatsiaaqqat marluk najukkameersut uuliamik ujaasiniarlutik sumiiffimmi angalaarsimapput.

 

Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq:

”Tunumi suli allamik uuliakoortoqarsimasinnaanera nalunaarutigineqarmat tamanna isumanerluutigaara. Kikkut tamarmik uuliamik mingutsitsinermik takussutissaasinnaasunik takusaqarsimasinnaasut Pinngortitamut, Avatangiisinut Inatsisinillu Atuutsitsinermut Naalakkersuisoqarfik imaluunniit najukkami upalungaarsimasut attaveqarfigeqqullugit kaammattussavakka.”

Pinngortitamut, Avatangiisinut Inatsisinillu Atuutsitsinermut Naalakkersuisoqarfiup Arktisk Kommando-p aammalu sumiiffimmi innuttaasut annertuumik tunniusimanerat ikiuukkumanerallu misigaa.

”Sermiligaap eqqaani uuliakoortoqarsimasinnaanera pillugu suliami ikiuussimasut aammalu piffissami aggersumi sumiiffimmi angalaartut eqqummaarillutik alaatsinaassamaartut tamaasa qutsavigaakka. Tamatta immani avatangiisivut sunnertiasut paarilluassavagut, aammalu ilisimavara, mingutsitsinerup sumiiffia paaseqqissinnaagaanni, sumiiffimmi upalungaarsimasut aallarnissamut piareersimasut,” Naalakkersuisoq Mala Høy Kúko oqarpoq.  

Uuliamik mingutsitsinermik takusaqaruit Pinngortitamut, Avatangiisinut Inatsisinillu Atuutsitsinermut Naalakkersuisoqarfik imaluunniit najukkami upalungaarsimasut attaveqarfigikkit

Uuliakoortoqarsimasinnaaneranik takusaqaraanni, makkuninnga iliuuseqarnissaq pingaaruteqarpoq:

  • Inissisimaffia aamma piffissap qanoq ilinera allakkit.
  • Maluginiaruk uulia qanoq isikkoqarnersoq (qalipaataa, isorartussusaa). 
  • Najukkami upalungaarsimasut imaluunniit Pinngortitamut, Avatangiisinut Inatsisinillu Atuutsitsinermut Naalakkersuisoqarfik sapinngisamik sukkanerpaamik attaveqarfigikkit (Upalungaarsimasut oqarasuaataat tlf. 529844 / 345000)

 

 

Annertunerusunik paasisaqarusunnermi: Attaveqarfigineqassaaq Naalakkersuisoqarfimmi pisortaagallartoq Mette Skarregaard Pedersen tlf. 529844