Nukissiuutivut mingutsitsinngitsut tulluusimaarutigisinnaavavut

Pinngortitamut, Avatangiisinut Inatsisinillu Atuutsitsinermut Naalakkersuisup Mala Høy Kúko-p aamma Nukissiuuteqarnermut, Pilersuinermut Silallu Pissusaanut Ministerip Lars Christian Lilleholt-ip Qorlortorsuarmi erngup nukinganik innaallagissiorfik tikeraarpaat.

Nukissiuuteqarnermut ministerit marluullutik namminneq takunnillutik nukik imermi toqqorsimasoq namminneerlutik malugisinnaavaat. Qorlortorsuarmi erngup nukinganik nukissiorfimmi isigisaq imaannaanngitsoq nukissiuutit silallu pissusaa pillugu apeqqutinik oqallinnissamut tunngaviliilluarpoq.

”Erngup nukinga Kalaallit Nunaanni nukissamik pilersuinermi pingaarutilinnut ilaavoq. Qorlortorsuarmi erngup nukinganik innaallagissiorfik uuliamik tikisitamik atuinani silallu pissusianut sunniuteqanngitsumik nukissamik annertuumik pilersitsisarpoq. Tamanna tulluusimaarutigisinnaavarput, taamaattumillu danskit ministeriannut innaallagissiorfik takutissinnaagakku tulluusimaarutigaara”, Pinngortitamut, Avatangiisinut Inatsisinillu Atuutsitsinermut  Naalakkersuisoq Mala Høy Kúko nassuiaavoq.

”Lars Christian Lilleholt-ip sapaatit akunneranni uani Kalaallit Nunaannut tikeraarnerani nukissiuutit silallu pissusia oqallisigisatsinni qitiutippavut. Danskit ministeriat erngup nukinganik isumalluutivut annertuut qanoq iliorluta nunatsinni atorluarnerivut takussallugit periarfissarsivoq, aammalu tunisassiornissamut nukissiuutinillu mingutsitsinngitsunik atuinissamut siuarsaanissamut periarfissat oqallisigeqqippavut”, Naalakkersuisoq Mala Høy Kúko nangippoq.

Ministerit marluullutik aamma silap pissusiata allannguutai pingaartillugit sammivaat. Kalaallit Nunaat Danmarkilu ataatsimoorlutik Kalaallit Nunaanni ilisimatusarnernik ingerlatsipput, taakkulu siunissami silap pissusiani qanoq pisoqarnissaanut paasinninnerulernermik kinguneqartitseqataapput. Ministerit ilaatigut Kangerluarsunnguarmi ilisimatusarfik Nuuk Basic tikeraarpaat.

Nuuk Basic Kalaallit Nunaata Danmarkillu suleqatigiillutik nunarsuarmi silap kissakkiartorneranik, tamatumalu Issittumi pinngortitamut inuiaqatigiinnullu sunniutaanik  ilisimatusarnermut pingaarutilinnik ilanngussaqartarnermut assersuutissaalluarpoq.

”Issittumi silap pissusaanik ilisimatusarnerup nunani tamalaani soqutigineqarnera ukiuni makkunani annertusiartorpoq, taamaattumillu tamanna pillugu kalaallit danskillu suleqatigiinnerisa Naalagaaffeqatigiit nunani tamalaani suliassaqarfimmi tassani siuttunngortippaat”, Mala Høy Kúko erseqqissaavoq.

 

Paasisaqarnerorusuttut attavigisinnaavaat allaffimmi pisortaagallartoq Karen Anne Arleth mobil +299 55 15 85 imaluunniit naalakkersuisup allattaa Elise Uupi Kuitse mobil +299 55 19 14.