Naalakkersuisut angalaqatigiittartui maligassiuisuussapput

Naalakkersuisut angalaqatigiittartui Nunani Avannarlerni maligassiuisuussapput

Naalakkersuisut angalaqatigiittartui, nuna tamakkerlugu inersimasunik meeraanerminni kinguaassiutitigut atornerlunneqarsimallutik kingunerlutsitsisunut katsorsaasartut, Nunani Avannarlerni soqutigineqarluarput.

Nunat Avannarliit Siunnersuisoqatigiivisa Atugarissaarneq pillugu Ataatsimiititaliaat taavalu Kultureqarnermut Ilinniartitaanermullu Ataatsimiititaliaat, nunat avannarliit inatsisartuini politikerinit inuttaqartut, juunip naanerani Nuummi ataatsimiipput. Inersimasut meeraanerminni kinguaassiutitigut atornerlunneqarsimallutik kingunerluuteqartut pillugit katsorsaanermi misilittakkat taavalu angalaqatigiittartut suliaat pillugit Kalaallit Nunaanni misilittakkat tikeraarnerminni tusagaqarfiginissaannut periarfissinneqarput.

“Inersimasut meeraanerminni kinguaassiutitigut atornerlunneqarsimallutik kingunerlutsitsisunut katsorsaaneq pillugu immikkut suliniuteqarput oqaluttuarivara” Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen oqarpoq nangillunilu, “Iliuuseqarnissarput taavalu iliuutsitta sunniuteqarnissaat uannut pingaaruteqarpoq. Angalaqatigiittartut suliaat pillugit ilisimatitsisarnerit pitsaapput. Ajunngitsumik ingerlarpasippugut.”

Kalaallit Nunaanni misilittakkat ataatsimiititalianit tigulluarneqarneqangaarmata Nunat Avannarliit Siunnersuisoqatigiivisa katersuunneranni, oktobarip naanerani Islandimi pisussami, “Kalaallit Nunaanni periuseq – Angaqatigiittartut” Nunani Avannarlerni maligassiuisuunissaa siunnersuutigineqarpoq.

“Suliarput misilittakkavullu Nunat Avannarliit sinnerinut ingerlateqqissavavut” Ilaqutariinnermut, Naligiissitaanermut Isumaginninnermullu Naalakkersuisoq oqarpoq nangillunilu, “Aatsaavissuaq Nunat Avannarliit katersuunneranni isumaginninnerup iluani Kalaallit Nunaanni misilittakkat aallaavigineqarput. Tamanna tulluusimaarutigisinnaavarput.”

Kinguaassiutitigut atornerlunneqarsimanermik kingunerluuteqarneq pillugu maajimi Nunat Avannarliit isumasioqatigiinneranni, Nunanit Avannarlerniit tamanit peqataaffigineqartumit, Kalaallit Nunaat qaaqqusisuuvoq.

Naalakkersuisut angalaqatigiittartui pillugit paasissutissat:

  • Naalakkersuisut angalaqatigiittartui april 2013-imi pilersinneqarput, suliamut misilittagalinnik tarnip pissusiinik ilisimasalinnik namminersortunik eqimattanut sisamanut avinneqarsimasunut inuttaqartoq.
  • Nunatsinni inersimasut ikigisassaanngeqisut meeraanerminni kinguaassiutitigut innimitsaalliorfigineqarnikuusimapput, tamatumalu kinguneranik assigiinngitsutigut inersimasunngornermi inuttut tarnikkullu kingunerlutsitsillutik. Innuttaasut ataasiakkaat pitsaanerusumik inuuneqarnissaannut periarfissiunnissaat, taavalu namminneq meeraasa assingusumik kinguaassiutitigut atornerlunneqarnissaat allatigullu sumiginnarneqarnissaat pinaveersaartinniarlugit angalaqatigiittartut ilaatigut aqqutissiuussissapput.
  • September 2013-imili Angalaqatigiittartut sulinertik aallartikkamikku Angalaqatigiittartut Kalaallit Nunaata ilarujussua tikereerpaat, ilaatigut Uummannaq, Aasiaat, Sisimiut, Paamiut, Maniitsoq, Qaqortoq, Nuuk taavalu Tasiilami assingusumik katsorsaanermut suliniuteqarneq august 2015-imi aallartinneqartoq.

Paasissutissat allat pissarsiarineqarsinnaapput Martha Lund Olsen-imut attaviginninnikkut, naalakkersuisup allattaa Sina Møller Kristiansen oqarasuaat 53 93 71 imaluunniit e-mail nimk@nanoq.gl imaluunniit immikkoortortaqarfimmi pisortaq Ellen Magnussen oqarasuaat 53 93 07 imaluunniit e-mail ello@nanoq.gl aqqutigalugit.

 

Inussiarnersumik inuulluaqqusillunga

Med venlig hilsen

 

Niels Thomas Andersen

Toqq/direkte 34 53 39