Aluminiu pillugu isumaqatigiissutip ilassusernissaa pillugu Naalakkersuisut Alcoa-lu isumaqatigiinniarput

Inuussutissarsiutinut, Sulisoqarnermut, Niuernermut Nunanullu Allanut Naalakkersusoq Vittus Qujaikitsoq, Borgmesteri Hermann Berthelsen Alcoa-llu sinniisaat ataasingornermi 24. august 2015 nunatsinni Alcoa-p aluminiumik aatsitsiviliornissamut pilersaarutaa pillugu Maniitsumi innuttaasunik ataatsimiissitsipput.

Innuttaasunik ataatsimissitsinermi aluminiup nunarsuaq tamakkerlugu niuerutiginissaanut inissisimaneq Alcoa-mit saqqummiunneqarpoq. Ukiut 2008 – 2015 ingerlanerini aluminiup akia 47 %-inik appariarsimavoq, maannakkullu niueqatigiinneq eqqarsaatigalugu aluminiumik aatsitsiviliornissaq erngullu nukinganik nukissiorfiliornissat ukiuni aggersuni qanoq pisussaaneri neriunarfigineqarsinnaanngitsutut oqaatigineqarput.

Tamannalu tunuliaqutaralugu illuatungeriit suleqatigiinnissamik isumaqatigiissusiaannut (MoU) ilassusiornissaq Naalakkersuisunit Alcoa-millu oqaloqatigiissutigineqarpoq. Tamassuma kingunerisussaavaa tatsini marlunni erngup nukinganik nukissiorfiliornissamut periarfissaasinnaasut, minnerunngitsumillu pilersaarusiornerup nalaani paasisarpassuit katersat ingerlatseqatigiiffinnut allanut tuniniarlugit Naalakkersuisunit avammut nalunaarutigineqarsinnaalissammata.

”Tatsit Alcoa-p pilersaarutaanut immikkoortinneqarsimasut erngup nukinganik pissarsiffigineqarsinnaanerat pillugit ingerlatseqatigiiffinnik allanik atuisussarniornissaq siunertaralugu periarfissaqalernerput nunannaarutigaara” - Naalakkersuisuni ilaasortaq Vittus Qujaukitsoq oqarluni ima nangippoq:

”Taamatut aneriarfissaqalerneq Alcoa-mik isumaqatigiissusiorluta atsioqatigisatsinnik atorunnarsitsinertut paasineqassangilaq, maannakkulli taamaaliornikkut nunatsinni mingutsitaanngitsumik nukissamik kalaallit pigisatinnik atuilluni suliffissualiorsinnaaneq siunertaralugu ammasumik unammisoqarsinnaalissaaq”.

Borgmesteri Hermann Berthelsen oqarpoq: ”Naak nunat tamalaat akornanni aningaasatigut inissimanerit taama isikkoqaraluartut Alcoa-p siunissaq ungasinnerusoq qiviarlugu nunatsinnik soqutiginninnertik attatiinnarniarlugu aalajangernerat uanga nunannaarutigaara. Ullumikkut innuttaasunik ataatsimiissitsineq Maniitsup Alcoa-llu akornanni kusarnartunik attaveqatiginnerinut uppernarsaatissatut uatsinnit isigineqarpoq.”

Annertunerusumik paasisarukkaanni attaveqarfissaq Inuussutissarsiornermut, Sulisoqarnermut Niuernermullu Naalakkersuisoqarfimmi pisortaaneq Jørn Skov Nielsen, e-mail jsn@nanoq.gl imaluunniit tlf.: 55 61 88