Knud Kristiansen ministererlu Danmarkimeersoq ataatsimiipput

Ineqarnermut, Sanaartornermut Attaveqaqatigiinnermullu Naalakkersuisup Knud Kristiansen-ip aammalu Danskit Nukissiuuteqarnermut, Pilersuinermut aammalu Silap pissusaanut Ministerip Lars Christian Lilleholt-ip ataatsimiinnerat.

Ineqarnermut, Sanaartornermut Attaveqaqatigiinnermullu Naalakkersuisup ippassaq 24. august 2015 Danskit Nukissiuuteqarnermut, Pilersuinermut aammalu Silap pissusaanut Ministeriat Lars Christian Lilleholt siunnerfeqarluartumik isumalluarnartumillu ataatsimeeqatigaa.

Ataatsimeeqatigiinnermi nunat akornanni annertuumik akaareqatigiittoqarpoq, taamatuttaaq ataatsimoorluni oqartussaaffigisat iluini suleqatigiinnerup pingaaruteqassusia naqissuserneqarpoq.

Immap assiliorneqarneranut aammalu sikusiornermut tunngatillugu suleqatigiinnerup pitsaasumik siunnerfeqarluartumillu inerisarneqarnissaa pillugu isumaqatigiittoqarpoq – suliassaqarfiit taakku marluk tulleriaarinermi pingaartinneqartuupput tassungalu atatillugu Danskit ministiat erseqqissaateqarpoq, teknologi nutaaq aammalu siunnerfilimmik iliuuseqarneq aqqutigalugit ukiut tulliuttut ingerlanerini aaqqiissutissat pitsaanerusut atorlugit Kalaallit Nunatsinni suliaq ingerlateqqinneqassasoq.

Immap assiliorneqarneranut tunngatillugu pilersaarut annertooq taamaattorli aamma piviusorsiortoq Naalakkersuisut pineqartut oqaloqatigiissutigaat, tassalu Geodatastyrelsemit immap assiliornertik nangissagaat tamatumalu malitsigisaanik immap assinginik nutaanik 73-inik amerlassuseqartunik saqqummiussisoqassasoq, taamaalilluni Kalaallit Nunatta kitaata annertunersaa immap assinginik peqalissaaq 2018 tikitsinnagu. 2015-mi suliassaq pingaarneq tassaassaaq Nunap isuaniit avannamut Upernavik tikillugu sinerissamut qanittumi immap assinginik suliarinnittoqassaaq, matumani pineqarlutik sinerissap qanittuani immap itissusaata 200 meter qaangernagu itissusillit aammalu sumiiffiit inuussutissarsiornermik ingerlataqarnissamut takornariaqarnermillu suliaqarnissamut soqutiginaatillit. Taamatuttaaq 2018-ip kingorna immap assiliornerit ingerlaqqinnissaat oqaloqatigiissutigineqarput, tassani pingaartumik Kalaallit Nunatta Kangiata imartaata assiliorneqarnissaata pisariaqarnera ilanngullugu eqqartorneqarluni. Danskit ministeriata ilisimatitsissutigaa suliassanik pingaarnersiuinermi suliassaqarfik matumani pineqartoq sallernut ilaatinneqartoq, taamaammat Geodatastyrelsemi sulisut amerlineqarsimasut, aammalu teknologi nutaaliaanerusoq atorlugu sulineq ingerlateqqinneqassasoq.

Sikunik nalunaarsuisarnermut tunngatillugu danskit Ministeriata ilisimatitsissutigaa, piffissami matumani sikunik nalunaarsuisarnerup pitsaanerulersinneqarnissaa siunertaralugu suliaqartoqartoq, matumanilu aamma atortorissaarutit nutaaliaanerpaat, tassalu qaammataasat atorlugit pitsanngoriartitsisoqarnissaa siunnerfigineqartoq. Piffissap ingerlanerani sikunik nalunaarsuinerit assitai pitsanngortinneqassapput, taamatuttaaq Danmarkimi silasiorfiup immikkut aallussinermigut qulakkeerniassavaa sikunik assiliinerit sapinngisamik piffissaq eqqorlugu tamanut takusassiarineqartassasut.

Ataatsimeeqatigiinneq pitsaasumik ingerlanneqarpoq, soqutigisaqaqatigiiffigineqartullu pillugit Naalakkersuisuni ilaasortat taakku marluk inussiarnersumik oqaluuserinissaannut periarfissartik atorluarpaat. Illuatungeriit kissaatigaat naatsorsuutigalugulu pitsaasumik suleqatigiinneq annertuunillu anguniagaqatigiinneq ingerlaannassasut.

 

Inussiarnersumik inuulluaqqusilluta

Ineqarnermut, Sanaartornermut Attaveqaqatigiinnermullu Naalakkersuisoqarfik

Sukumiinerusumik paasisaqarusuttoqassappat attavissaq:

Jensine Berthelsen

Naalakkersuisup allattaa

+299562303 / +299345450

jebe@nanoq.gl