Saammaateqatigiinnissamut Isumalioqatigiissitap avannaamiut oqaloqatigissavai

Isumalioqatigiissitaq avannaani sumiiffinni arlariinni innuttaasunik ataatsimiisitsissaaq, piffissami 2015-mi augustip 26-niit septembarip 16-ta tungaanut. Isumalioqatigiissitaq aamma oqaluttuanik katersissaaq, tassani inuiaqatigiit namminneq oqaluttuaat aallaavigineqassallutik.

”Innuttaasunik ataatsimiisitsinerni isumalioqatigiissitami sulinerput ilisimatitsissutigissavarput, innuttaasullu oqaloqatiginerisigut ilisimasaannik katersissaagut. Innuttaasut paasissutissanik isummanillu isumalioqatigiissitami sulinermi attuumassuteqartunik tapersiisinnaasariaqarput, taamaammat pingaartipparput innuttaasut tikinnissaat. Innuttaasunik ataatsimiisitsinerit saniatigut aamma oqaluttuanik ataasiakkaanik inuunermut tunngassuteqartunik katersissaagut. Taakkua inuunermik oqaluttuat inuiaqatigiit namminneq inuunerminni suut pitsaasut pitsaanngitsullu misigisimaneraat oqaluttuarnerminni aallaavigissavaat kiisalu unammillernartut innuttaasut ataasiakkaat aqqutigisimasaat aallaavigineqassallutik. Qilanaaraarput innuttaasut naapinnissaat oqaloqatiginissaallu,” Isumalioqatigiissitaq sinnerlugu taama oqaaseqarpoq Ida Mathiassen.

Innuttaasunik ataatsimiisitsinerit sumiiffinni piffissanilu ukunani ingerlanneqassapput:

Qaanaaq: Pingasunngornermi aggustusip 26-ni nal.19.30 Avanersuup atuarfiani

Siorapaluk: Arfininngornermi aggustusip 29-ni nal.11 Siorapaluup atuarfiani

Upernavik: Pingasunngornermi septembarip 2-ni nal.19.30 Katersortarfimmi

Kullorsuaq: Sisamanngornermi septembarip 3-ni nal.19.30 atuarfimmi

Ilulissat: Marlunngornermi septembarip 8-ni nal.19.30 Sermermiuni

Uummannaq: Sisamanngornermi septembarip 10-ni nal.19.30 Edvard Krusep atuarfiani

Saattut: Arfininngornermi septembarip 12-ni nal.10.30 Illu Sullivimmi

 

Isumalioqatigiissitaq malinnaavigineqarsinnaavoq Facebookimi quppernermi “Saammaateqatigiinnissaq” aqqutigalugu aamma nittartakkakkut www.saammaatta.gl.

 

Annertunerusumik paasissutissat pillugit attavissaq: Mari Kleist, Saammaateqatigiinnissamut Isumalioqatigiissitap Allattoqarfia, email: marh@nanoq.gl, mobil: 537828