Kinguaassiuutitigut nappaatit akiorniarlugit nukittorsaarusuppugut

Kinguaassiuutitigut nappaat syfilis ilisimaligarput nutaaq, nutaarsiassaavoq pingaarutilik, tassani Naalakkersuisut pitsaaliuinermut nakorsartinnissamullu iliuusissanik piaartumik ilanngutineratigut.

Peqqinnissaqarfik ataavartumik pitsaaliuinermut iliuuseqartaraluarluni misissuinerup takutippaa nappaammit syfilisimit tunillatsittut amerliartuinnartut, taamaattumillu kinguaassiutitigut nappaatip tuniluunnera unitittariaqarpoq.

”Syfilis-imik nappaatillit amerliartuinnarnerat ernummanarpoq. Nakorsat kinguaassiuutitigut nappaatit tuniluunnerannik misissuereernermi saqqummiussaat, pingaartutut isigaara”, taama oqarpoq Doris Jakobsen.

Nangipporlu: ”Paasisat nutaat nuannaarutigaakka. Paasisammi tunngavigalugit, peqqinnissaqarfiup siunissami kinguaassiuutitigut misissuinermi neqeroorutai tulluarsarsinnaalissavagut”, taama oqarpoq Peqqissutsimut Naalakkersuisoq.

Isumannaatsumillu atoqatigiinnissamut siunnersuilluni:

”Usuup puua atorlugu isumannaatsumik atoqateqarit, taannami kinguaassiuutitigut nappaatinut tamanut illersuutaavoq”, Doris Jakobsen oqarpoq.

Nakorsaaneqarfik kinguaassiuutitigut nappaatit nappaatillu tuniluuttartut allat tuniluunneranut nakkutiginnittuuvoq.

”Nunatsinni nakorsaaneq nutaaq 1. oktober atorfineriarpat Peqqissutsimut Pitsaaliuinermullu Aqutsisoqarfik peqatigalugu naapittussaavara, tassanilu eqqartussavarput, kinguaassiuutitigut nappaatit akiornissaannut iliuutsit qanoq nukittorsarsinnaanerlutigit”.

Paasissutissanik allanik paasisaqarusukkut naalakkersuisumut allatsi Rosa Thorsen +299553303 attavigineqarsinnaavoq.