Innuttaasunik ataatsimiisitsinissamut aggersaaneq

Siusinaartumik pensionisianik utoqqalinersiutinillu aaqqissuusseqqinneq pillugu Naalakkersuisut innuttaasunik ataatsimiisitsinissamut aggersaapput.

Naalakkersuisut siusinaartumik pensionisianik utoqqalinersiutinillu aaqqissuusseqqinnissamut siunnersuummik Inatsisartut ukiaanerani ataatsimiinneranni saqqummiussissapput.

Siusinaartumik pensionisianik utoqqalinersiutinillu aaqqissuusseqqinnissamut Naalakkersuisut siunnersuutaat pillugu paasisaqarnerunissaminnut soqutiginnittut tamarmik augustip naaneraniit septembarip aallartinneranut innuttaasunut ataatsimiisitsinerni aggersarneqarput (ataani ulloq sumiiffillu pillugit paasissutissat takukkit).

Nanortalimmi, Narsami, Qaqortumi, Maniitsumi, Ilulissani, Aasianni Kangerlussuarmilu innuttaasunik ataatsimiisitsinermi Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen peqataassaaq, oqarporlu “Siusinaartumik pensionisianik utoqqalinersianillu aaqqissuusseqqinnikkut innuttaasut pisariaqartitsivissut pitsaanerusumik atugassaqalernissaannut pilersitsinissaq eqqumaffiginerulissavarput. Siusinaartumik pensionisiallit sulisinnaasut amerlanerit suliffeqarnermut akuusariaqarput. Innuttaasunik ataatsimiisitsinerni siunnersuutivut oqaluttuarinerunissaannut qilanaarpunga”.

Siusinaartumik pensionisiallit sulisinnaasut amerlanerit sulissapput

Siusinaartumik pensionisianik aaqqissuusseqqinnissaq atorlugu Naalakkersuisut siusinaartumik pensionisiallit amerlanerit sulilertikkusuppaat. Suliffinni pisortanit tapersersukkani immikkut atugassaqartitaalluni imaluunniit piginnaanngorsaqqinnermut suliniuteqarnikkut suliffinni nalinginnaasuni, amerlasuut suliffeqarnermut uternissaminnut periarfissaqavipput. Allanit pilersorneqarunnaarluni suliffeqarnermut pigaanni inuiaqatigiinnut peqataasoqalertarpoq, taamaasilluni inuunermi atukkat pitsaanerulissapput pitsaanerusumillu inuuneqalerneq anguneqassalluni – inunnut ataasiakkaanut inuiaqatigiinnullu iluaqutaasumik.

”Pisinnaatitaaffiit pisussaaffiillu pissakinnerillu sammineqarnerullutik”

Naak utoqqaat amerliartoraluartut sivisunerusumillu inuusaleraluartut, isumaginninnikkut aningaasaqarniarnikkullu imminut napatissinnaasumik utoqqalinersianik pilersitsinissaq aaqqissuusseqqinnermut siunertaavoq.

Innuttaasut utoqqaat naammaginartunik inuunermi atugassaqarnissaat Kalaallit Nunaanni inuiaqatigiit atugarissaartut qulakkiissagaat Naalakkersuisut politikkikkut anguniakkaminni pingaartilluinnarpaat. Utoqqalinersiuteqalernissaminnut ileqqaagaqartartut, nammineq ileqqaagallit imaluunniit ullup ilaannaa suliffillit utoqqalinersiutillit pitsaasumik inuuneqartut amerligaluttuinnarput, taamaasillutik utoqqalinersiutiminnik isumalluuteqarnerat annikinnerulerluni. Illua tungaanili sivisuumik sulereerlutik nungullarsimasut utoqqaallu annikitsumik atorsinnaasaminnik aningaasaatillit suli utoqqalinersiuteqarnissaminnik pisariaqartitsipput. Aaqqissuusseqqinnermi tamanna aaqqinniarneqarpoq. Tunngavik ”Pisinnaatitaaffiit pisussaaffiillu pissakinnerillu sammineqarnerullutik” atorlugit utoqqalinersiallit ilungersunartumik inissisimasut atugaat pitsanngorsarnissaat

Naalakkersuisut kissaatigaat.

Innuttaasunik ataatsimiisitsineq (allannguuteqarsinnaaneri eqqumaffigineqassaaq)

24. august Nanortalik: Katersortarfik nal. 19

25. august Narsaq: Timersortarfik nal. 19

26. august Qaqortoq: CamPus Kujalleq GU, atuarfiup inersuani nal. 19

Septembarimi Kalaallit Nunaata Avannaani aamma innuttaasunik ataatsimiisitsisoqarumaarpoq.

Innuttaasunik ataatsimiisitsineq kalaallisut ingerlanneqassaaq, qallunaatut oqalutseqarumaarpoq.

Kaffi/tii kaagillu sassaalliutigineqarumaarput.

Kikkut tamarmik tikilluaqqusaapput.

Paasissutissat allat pissarsiarineqarsinnaapput naalakkersuisup allattaa Sina Møller Kristiansen oqarasuaat 34 69 49 aqqutigalugu