Aningaasaqarnermut Naalakkersuisoqarfimmi naalakkersuisoqarfimmi pisortaq nutaaq

Selvstyrebygningen i Nuuk

Naalakkersuisut ullumi aalajangerput, Nikolai Sten Christensen Aningaasaqarnermut Naalakkersuisoqarfimmi naalakkersuisoqarfimmi pisortatut atorfimmik neqerooruteqarfigineqassasoq. Nikolai Sten Christensen Aningaasaqanermut Naalakkersuisoqarfimmi naalakkersuisoqarfiup pisortaatut ulloq 1. oktober 2015 atorfinissaaq.

Nikolai Sten Christensen suliat tungaasigut ilaatigut Nunatsinni pisortani atorfeqarsimavoq, tassunga ilanngullugit Peqqinnissaqarfik aamma Inatsisartut Allattoqarfiat. Nikolai Sten Christensen Inatsisartut Allattoqarfiannit allattoqarfiup pisortaatut atorfeqarsimavoq.

Naalakkersuisoq Andreas Uldum oqarpoq:
"Nikolai Sten Christensenip Inatsisartuni sulinermi ilisarisimalluakkama suleqatiginissaa qilanaaraara. Nikolai Sten Christensen sukumiisumik suleriaaseqarnermi saniatigut inuuvoq ilakkuminartoq, siammasissumik aqutsinermik politikkimillu ingerlatsinerup iluani minnerunngitsumillu Aningaasanut Inatsimmik aningaasaqarnermillu ingerlatsinermik politikkikkut akisussaaffimma qiterisaanik annertuumik ilisimasaqartoq.

Aningaasaqarnermik Naalakkersuisoqarfimmi naalakkersuisoqarfiup pisortaatut atorfik ukiuni marlunni kingullerni pisortaagallartumit Peter Hansenimit atorfigineqarsimavoq. Peter Hansen piffissami pineqarumi annertoorujussuarmik suliaqarsimavoq Naalakkersuisullu tungaanniit Peter Hansen suliai pillugit annertuumik qujassutissaqarfigaarput.”

Aningaasaqarnermut Naalakkersuisoqarfimmi naalakkersuisoqarfiup pisortaatut qinnuteqartut arfiniliusimapput.

Nuuk, ulloq 20. august 2015
Naalakkersuisut Siulittaasuata Naalakkersuisoqarfia