Tunisassiat puisineersut arfattassallu ilisimatitsissutigineqarput

Aalisarnermut, Piniarnermut Nunalerinermullu Naalakkersuisup, Karl-Kristian Krusep, Danmarkimi nunanut allanut ministeri, Kristian Jensen, aggustip 17-ianni ataatsimeeqatigivaa.

Ataatsimeeqatigiinnermi Karl-Kristian Krusep nunanut allanut ministeri ilisimatippaa tunisassianik puisineersunit eqqussisinnaanermut EU-p inatsisiliorneranit iluarsaassineq.

- Piumanerusimagaluarpara  EU-p tunisassianit puisineersunit eqqusseqqusiunnaarnera atortuulersinneqanngisaannarsimassasoq, aalajangiinermi misigissutinik aallaaveqarmat aamma eqqortuunngitsunik tunngaveqarluni aalajangiinerusinnaammat, Karl-Kristian Kruse erseqqissaavoq.

Naalakkersuisuni ilaasortap aamma pingaartillugu oqaatigaa inerteqquteqarneq, naak inuiaqatigiit pitsaanngitsumik sunnerneqarnissaat anguniagaanngikkaluartoq, Kalaallit Nunannut ilungersunartunik kinguneqarsimavoq, Great Greenland A/S-mit tunisinermit paasissutissatigut takutinneqarmat, Inuit ilaatinneqannginnerat piviusumik atuutsinngitsoq. Ilaatigut Inuit tunisassianut puisineersut EU-mi atuisut tatiginnittuunngillat.

- Inuit ilaatillugit paasititsiniaanissaq pisariaqartinneqartorujussuuvoq, neriuutigaaralu pisussaaffinnik tamanna Kommissionimit isumagineqassasoq. Ilutigalugu peqqussutip siunertarineqartut atuutsinneqarnera pillugu naliliinissaq qilanaaraara, Karl-Kristian Kruse oqarpoq.

IWC-ip killiffia

Kalaallit Nunaat ilisimatuussutsikkut tunngavilersukkanik ukiuni sisamani arfattassinneqarpoq, tamannalu nunat inoqqaavisa piniariaasiat naapertorlugu IWC-ip aqutsinera pitsanngorsarnissaanik suliniuteqarnissamut periarfissiivoq, tassani politikki peerlugu ilisimatuussutsikkut sulineq inissaqarnerulersillugu.

- Nunanik IWC-mi ilaasortarpassuarnik isumaqatiginninniarnerni Danmarkip Kalaallit Nunaatalu ataatsimoorlutik sulilluarsimanerujussuat pillugu qujamasuutigaara. Tamannami IWC-p kingullermik ataatsimiinnerani kalaallit paasineqarlutik pisassinneqarnissaanut isumaqatigiissuteqarnermut aqqutaalluarsimavoq, Karl-Kristian Kruse erseqqissaavoq.

Aalisarneq

Naalakkersuisuni ilaasortap Kalaallit Nunaata Savalimmiunik aalisarneq pillugu suleqateqarnera oqaatigisaasa ilagaat, nunat NEAFC-p, NAFO-p NASCO-llu aqutaanik aalisarneq pillugu suleqatigiinnermut ataatsimoorlutik aallartitaqarlutik.

Suleqatigiinneq tamanna 2014-inip ingerlanerani ajornartorsiuteqarluni ingerlanneqarpoq, pingaartumik NEAFC-mut tunngatillugu. Kalaallit Nunaat NEAFC-p suliassaqarfianut soqutigisaqaleriartuinnarpoq, avaleraasartuut aalisakkallu ikerinnarsiortut pillugit.

- Danmark, Savalimmiut aamma Kalallit Nunaata siniussami suleqatigiinnissaanni tamanna aalajangiisuusussamik pingaaruteqarpoq, susassaqartut amerlasuutigut isumaqatigiinneq ajormata, Karl-Kristian Kruse oqarpoq.

 

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl