Kapisillip nalunaaqutaanik nassiussisoq akissarsivoq

Kapisillit nalunaaqutaanik nassiussisup kapisillit nalunaaqutaat angerlarsimaffimmini 1980-ikkunnili pinnersaatitut nivingatippai.

Kapisillit nalunaaqutaanik nassiussisimasutut ukioq manna akissarsisinneqartoq tassaavoq kangaamiormiu aalisartoq piniartorlu James Larsen. Taanna NASCO-p akissarsissutigisartagaanik West Greenland Tag Returnimik 1.500 dollarsinik ippassaq, marlunngornermi aggustip 18-anni akissarsitinneqarpoq.

James Larsen kapisilinnik nalunaaqutalinnik Kangaamiut avataanni 1980-ikkunni pisaqarpoq.

- Kapisillit nalunaaqutaat sussallugit nalusimavakka alapernaassimanangalu suneqartarnersut, James Larsen, 50-inik ukiulik oqaluttuarpoq.

Aasiammiu Susanne Petersen Thorin kapisillit nalunaaqutaannik nassitsisimasutut siorna akissarsitinneqarpoq, 1.500 dollarsinillu aningaasannalluni. James Larsenip nulia Susanne Thorin Petersen akissarsinneqarmat tusagassiuutinut malinnaavoq.

- Nuliama kapisillit nalunaaqutaanik Pinngortitalerfimmut  ukioq manna nassiusseqqullunga kajumissaarsimanngikkaluarpanga, tamassa nalunaaquttat suli nivingatillugit angerlarsimaffitsinni pinnersaataassagaluarput, James Larsen oqarpoq.

Aalisarnermut, Piniarnermut Nunalerinermullu Naalakkersusisoq, Karl-Kristian Kruse, aamma NASCO, North Atlantic Salmon Conservation Organization, sinnerlugit Kangaamiuni KNAPK-p immikkoortortaata sinniisua James Larsen II akissarsititsisuuvoq.

Aalisarnermut, Piniarnermut Nunalerinermullu Naalakkersuisoq, Karl-Kristian Kruse, aamma NASCO-p præsidentiata, Steinar Hermansen, James Larsen pilluaqqorujussuarpaat.

Kapisilinnut nalunaaqutsiunneqartartut pisoqalineq ajorput, qangalili pisaasimasut nalunaaqutaat nassiunneqarsinnaasarlutik. Tamanna ukioq manna nassiussisup  uppernarsarpaalusooq.  James Larsenip nalunaaqutaq nassiussimasaa tassaammat USA-mi kuussuit ilaanni Penobscotimi 1984-imi nalunaaqutsiunneqarsimasoq.

- Kaammattuutigiinnassavarput angerlarsimaffinni nalunaaquttamik arlaanni peqannginnersoq misissuilluartaqqullusi, ukioq mannalu kapisilittarisimasat aamma nalunaaqutaqannginnersut alaatsinaattaqqullugit, Aalisarnermut, Piniarnermut, Nunalerinermullu Naalakkersuisoqarfimmi immikkoortortami pisortaq, Emanuel Rosing erseqqissaavoq. 

NASCO

NASCO tassaavoq nunat naalakkersuisuisa suleqatigiiffiat, kapisilinnik Altantikup avannarpasissuaniittunik peqartuaannarnissaanik suliniaqatigiiffiat, kapisileqatigiit qularnaatsumik  aqutsinikkut piujuaannaqqullugit suliniaqatigiiffiusoq. 

NASCO-p Atlantikup avannarpasissuani kapisileqartuarnissaanik suliaqarnerminut ilanngussimavaa kapisillit nalunaaqutsersortarlugit. Suliniaqatigiiffiullu tamaani najugallit kajumissaarpai kapisilinnik nalunaaqutalinnik siumugaqarsimagunik,  taakku nassiuttassagaat sumi qangalu pisaasimaneri ilanngullugit ilisimatitsissutigineqartassasut.  Taamaalilluni kapisillit nuuttarneri tamatumuunakkut ilisimasaqarfiginerulissammata.

Nunatsinni kinaluunniit nalunaaqutalimmik kapisilittoq, pisarisami nalunaaqutaa Pinngortitaleriffimmut nassiussinnaavaa. Pinngortitaleriffiup nalunaaqutaq NASCO-mut nassiuttarpaa, suliniaqatigiiffillu ukiut tamaasa ataatsimiinnermini nalunaaquttanik nassiunneqarsimasunik makitsisarpoq, makinneqartoq 1.500 dollarsinik aningaasartalinnik akissarsisinneqartarluni.  

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl