Neqeroorutinik nutaanik pisariaqartitsineq

Meeqqanut inuusuttunullu inissinneqarsimasunut neqeroorutinik nutaanik pisariaqartitsineq

Pingasunngorneq ulloq 5. august "Meeqqat ajornartorsiortut pillugit kalerrisaarineq" AG-mi naqinneqarsimasumi allaaserineqarpoq. Allaaserisami meeqqat inuusuttullu ulloq unnuarlu paaqqinnittarfimmi Orpigami Kangerlussuarmi inissinneqarsimasut, tillinniartarlutillu aserorterisartut taavalu imminnut nunaqarfiullu innuttaanut allanut navianartorsiortitsisinnaasut, sammineqarput.

Eqimattanut taakkununnga perorsaataasunik tulluartunik neqeroorutinik amigaateqarneq Ilaqutariinnermut, Naligiissitaanermut Isumaginninnermullu Naalakkersuisoqarfimmit eqqumaffigineqarpoq. Aammattaaq meeqqat inuusuttullu ulloq unnuarlu paaqqinnittarfinni inissinneqarsimasut ajornartorsiutaasumik pissusilersortarnerat Kangerlussuarmi paaqqinnittarfiup kisimi ajornartorsiutiginngikkaa, aammali ulloq unnuarlu paaqqinnittarfinni allani Namminersorlutik Oqartussanik pigineqartuni tamanna unammilligassaasoq Naalakkersuisoqarfiup eqqumaffigivaa.

Orpigaq paaqqinnittarfiuvoq imminut pigisoq, Naalakkersuisoqarfiullu nakkutilliinissaq kisiat suliassarivaa. Pisumi uani Naalakkersuisoqarfiup Kangerlussuarmi Orpigaq piumaffiginikuuaa, paaqqinnittarfiup nunaqarfiullu akornanni pissutsit ajortumut ingerlaqqinnginnissaat siunertaralugu, unammilligassat paaqqinnittarfimmi misigineqartut pillugit nassuiaammik nassiusseqqullugit.

Sisimiuni isumaginninnermi perorsaaviusumik paaqqinnittarfimmik isumannaallisakkamik 2014-imi Naalakkersuisoqarfik ammaanikuuvoq, tassani meeqqat 15-it sinnerlugit ukiullit Politiinit tigummineqartut immaqaluunniit pinerluuteqarsimanermut eqqartuussaasimasut imminnut inuiaqatigiillu illersornissaat siunertaralugu inissinneqarsinnaallutik. Inatsisiliornerli nunallu tamalaat akornanni isumaqatigiissutit Kalaallit Nunaannit ilaaffigineqartut massakkut atuuttut malillugit inissiineruvoq piffissami aalajangersimasumiinnaq atorneqarsinnaasoq.

Taamaattumik meeqqanut inuusuttunullu sumiginnarneqarsimasunut amerligaluttuinnartunut, sakkortuumik ajoqutaasumillu pissusilersuutilinnut tulluarsakkamik isumaginninnermi perorsaaviusumik inissiinissamut neqeroorummik qulakkeerinninniarluni, taassuma ataani ulloq unnuarlu paaqqinnittarfinni sulisunik piukkunnartunik pissarsiornermi sulititsiinnarnissamullu tunngatillugu aaqqissuussaanikkut unammilligassat suunersut paasiniarlugit Naalakkersuisoqarfik sulivoq.

Paasissutissat sukumiinerusut pissarsiarineqarsinnaapput uunga attaviginninnikkut:

Naja H. Abelsen
Ulloq unnuarlu paaqqinnittarfiit immikkoortortaqarfianni immikkoortortaqarfimmi pisortaq
Ilaqutariinnermut, Naligiissitaanermut Isumaginninnermullu Naalakkersuisoqarfik
Oqarasuaat. 34 66 48
Mail: naha@nanoq.gl