Nunatsinni sanaartornermut atortussanik atuinerulerneq

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq aamma Kommune Kujallermi borgmesteri Jørgen Wæver Johansen, kiisalu Inuussutissarsiornermut Suliffeqarnermullu Ataatsimiititaliami ilaasortat ulluni kingullerni marlunni Kujataani suliffeqartitsinerup annertusarsinnaanera pillugu seminareqarsimapput.

Ilaatigut Kalaallit Nunaanni tunisassiarineqartunik tamakkiisumik kuisanik betonngimut atugassanik betonngitullu ujaqqianik ilusilinnik nunatsinnit sanaartornermut atugassianik misileraalluni sanaartornerup aallartisarnissaanik ataatsimiinneq ilaatigut sammisaqarpoq. Tamatumani Narsarsuarmit taamatut tunisassiornerup pilersissinnaanera misissorneqarpoq, kiisalu Narsarsuarmi Narsamilu illunik betonnginik ujaqqianik sanaartukkanik misissuisoqarluni, ilaatigut piffissami qaninnerusumi Siku Blockimit najoqqutaqartumik tunisassiarineqartunik, ilaatigullu 1950-ikkunni amerikamiut betonnginik ujaqqianik atugassanillu sanaartugaasunik.

Taamatut sanaartortoqarneq – nunatsinni annertusisamik sulisoqalernerup saniatigut – sanaartukkap atuuffigisaanik aningaasaqarnikkullu piujuartitaaneranik annertuumik annertusaasinnaassasoq naatsorsuutigineqarpoq. Iluaqutissat allat tassaapput oqunitsitsersinnaanerup annikillisinnissaa, aammalu aserfallatsaaliuiuarnermut aningaasartuutit annikinnerpaatilernissaat.

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq oqarpoq: ”2016-imut aningaasanut inatsisissatut siunnersuummi suliniummut aningaasaliissummik Naalakkersuisut immikkoortitsipput, taakku najukkani atortussanik tunisassiornernik nutaanik misileraanerpianut tunngallutik”, nangipporlu; ”Ukiuni takkuttussani sanaartornerni annertunerusumik kalaallinik sulisoqalernerup qulakkeerniarneranut tamanna alloriarnertut pingaarutilittut isigaara.”

Borgmester Jørgen Wæver Johansen oqarpoq: ”Pilersitsinikkut tassuuna piviusumik iliuusissamik pilersaarutip aallartinnera pingaartuuvoq, Kujataanilu pisarialinnik piginnaanernik peqarnerput qularutissaanngilaq, assersuutigalugu nunatsinnit tunisassiamut sunniuteqartumut sivisuumillu attanneqarsinnaasumut Siku-blokkinik tunisassiorneq taasassaqqilluni”.

Kujataani seminarimi ilaatigut peqataasut tassaapput Narsarsuarmi, Qassiarsummi Igalikumilu nunaqarfimmi aqutsisut siulittaasuat Mouritz Karlsen, Kommune Kujallermi suliffeqarfimmut ataatsimiititaliap siulittaasua Simon Simonsen, kiisalu Kista Isaksen, aamma Ole Mølgaard-Motzfeldt, Inatsisartuni ilaasortaq Ineqi Kielsen, Ineqarnermut Attaveqarnermullu Naalakkersuisoqarfik, aamma Inuussutissarsiornermut, Suliffeqarnermut Niuernermullu Naalakkersuisoqarfik. Nunatsinnit betonnginik atugassanik tunisassiorsinnaanermut Siku Blockimit Ferdinand Maqe aamma Jakob Knudsen sinniipput. Seminarimut ilaliullugu najukkamit tunisassianit Siku-blokkinik sullissisarfinnik illunillu sanaartukkat takutinneqarput.

Ilaliullugit Vittus Qujaukitsup aamma Jørgen Wæver Johansenip Kujataani attaveqarfinni suliniutit nutaat oqaluuseraat, ilanngullugu Qaqortumi nutaamik mittarfimmut neriunartoqarfigisaq. Tassunga atatillugu aqqusinniorneq aamma Saqqaarsik/Iterlaap tunuani ineriartortitsivissaq nutaaq takusarpaat.

Kiisalu aalisakkanik suliffissuaq Arctic Prime Productions takusarneqarpoq, tassani saarullittassanit nutaanit suliffeqartitsinikkut sunniutaasussat oqaluuserineqarlutik. Ingerlatseqatigiiffiup nunami suliffeqarfigisaani suliarinneqqaarnissat pillugit piumasaqaatit nunap ilaani suliffeqartitsinermut annertuumik sunniuteqarsimavoq. Nunami suliffeqarfigisami aamma aalisariutini tamakkiisumik inuit 150-it tikillugit suliffeqartillugit ingerlatseqatigiiffiup ilisimatitsissutigaa.

Annertunermik paasisaqarniaruit attavigiuk Inuussutissarsiornermut, Suliffeqarnermut Niuernermullu Naalakkersuisoqarfiup pisortaa Jørn Skov Nielsen, e-mail jsn@nanoq.gl imlt. oqarasuaat: 55 61 88 imaluunniit Kommunaldirektør Frank Hedegaard, e-mail fhj@kujalleq.gl imlt. oqarasuaat: 490133