Danmarkimi nunanut allanut ministeri Kristian Jensen Kalaallit Nunaannut tikeraarpoq

Nunanut allanut ministeri Kristian Jensen ulluni 17. – 18. august nunanut allanut ministeritut Kalaallit Nunaannut siullermeertumik tikeraarpoq, tassani Nuummi ataatsimeeqateqassalluni.

Tikeraarneq Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq peqatigalugu pilersaarusiorneqarpoq. Ullumi ataatsimiinnermi ministerit marluk taakkua suleqatigiiffiusussat pingaaruteqartut arlallit, soorlu urani, nunavittamut tunngatillugu suliniut, tunisassiat Kalaallit Nunaanneersut avammut niuernermi nioqquteqarfiusunut isersinnaatitaanissai, IWC, kiisalu EU-mi aamma Issittumi Siunnersuisooqatigiinni suleqatigiinneq, oqallisiginissaannut periarfissaqartinneqarput. Aamma Pituffimmi Sakkutooqarfimmut tunngatillugu Danmarkip aamma Kalaallit Nunaata suleqatigiinnerat ataatsimiinnermi oqallisigineqarpoq.

Kristian Jensenip aamma tikeraarnermini Aningaasaqarnermut Aatsitassanullu Naalakkersuisoq Anda Uldum, Aalisarnermut, Piniarnermut Nunalerinermullu Naalakkersuisoq Karl-Kristian Kruse, kiisalu Inatsisartut Nunanut Allanut Sillimaniarnermullu Ataatsimiititaliaanni ilaasortat ataatsimeeqatigissavai.

Naalakkersuisoq Vittus Qujaukitsoq oqarpoq:

”Danskit nunanut allanut ministeriallu qanimut oqaloqatigiittarnissaq Kalaallit Nunaannut pingaartuuvoq. Taamaattumik Kristian Jensenip atuuffigilikkamini sulilernermi kingorna taama sukkatigisumik Kalaallit Nunaannut tikeraarnissaa pingaarnersiuinermi salliutissimavara. Tamatuma Kalaallit Nunaata aamma Danmarkip qanimut suleqatigiinnerat erseqqissarpaa.

Tikeraaqarnitta pitsaasumik oqaloqatigiittarnerit aallartinnissaannut periarfissippaatigut aammalu suliassaqarfiit suleqatigiiffigisatta oqallisiginissaannut periarfissaqartilluta. EU-mi puisit amiinut peqqussutip iluarsaanneqarnerata malitsigisaannik unammilligassaqarnitta erseqqissarnissaanut, aammalu siunissami suleqatigiinnissatsinnut kissaatigisatta saqqummiunnissaannut Nunanut allanut ministerimik ataatsimeeqateqarneq ilaatigut atorpara.

Nunanut allanut ministereqarfiup ukiumoortumik Danmarkip ambassadøriinik qaammammi matumani kingusinnerusukkut ataatsimeeqateqarnerata Københavnimi ingerlanneqarnerani Kalaallit Nunaat akuutinneqaleriissasoq isumaqatigiissutigaarput. Tassani ministerip nunatsinneersup siullermeertumik, danskit ministerii peqatigalugit, Naalakkersuisut pingaartitaat saqqummiutissavai aammalu ataatsimoorussamik oqariartuuteqarnerit pillugit ambassadørit oqalliseqatigissallugit. Ulloq 31. august immikkut aggersaaviusumik Issittumi ministerit ataatsimiinnerat USA-p Alaskami Anchoragemi ingerlatissavaa. Aamma tassani isumaqatigiissutigaarput Danmarki aamma Kalaallit Nunaat peqatigiillutik oqariartuutissavut piareersassagaat saqqummiutissallugillu.

Ullumi ataatsimeereernerup kingorna Kristian Jensenip nunanut allanut ministeriunerani, Danmarkimik suleqateqarnitta suli annertunerusumik nukittorsarneqarnissaanut ineriartortinneqarnissaanullu qilanaarpunga.”

Annertunerusunik paasisaqarusunnermi attaveqarfissaq AC-fuldmægtig Rebecca Lynge, Nunanut Allanut Pisortaqarfik
Toqq/direkte 345156 / 553328
rejl@nanoq.gl