Peqqinnissaqarfik ilinniarsimasunik atorfissaqartitsivoq

Nunat Avannarliit Killiit Siunnersuisoqatigiiffia Runavikimi Savalimmiuni ukiumoortumik ataatsimeersuarpoq. Naalakkersuisunit Peqqissutsimut Nunallu Avannarliit suleqatigiinnerannut Naalakkersuisoq Doris Jakobsen ataatsimeersuarnermi ilaasoq, pingasunngornermi nunat avannarliit killiit akornanni peqqinnissaq pillugu suliniutit oqalugiaammini ilaatigut eqqaavai. Naalakkersuisup nunatsinni peqqinnissaqarfiup sulisoqarniarnera kipiluttunartoq eqqaavaa.

Naak Kalaallit Nunaata Islandip napparsimmavissua Landspitali suleqatigiinnissamik isumaqatigiissuteqarfigereeraluaraa manna tikillugu suli katsorsartinnissanik neqerooruteqartoqanngitsoq Doris Jakobsenip eqqaavaa. Naalakkersuisulli neriuutigaa katsorsartittarnissamut periarfissat ungasippallaanngitsukkut piviusunngortinneqarumaartut.

Nunat Avannarliit Killiit Siunnersuisooqatigiivisa 2013-imi ilaasortat kajumissaarpaat peqqinnissaqarfiup iluani ilinniarneq sulisunillu paarlaaqatigiittarneq suleqatigiissutiginiarlugit, tamakku maanna Kalaallit Nunaata pisariaqartilluinnarmagit.

-Kalaallit Nunaat ullumikkut ima inissisimavoq nakorsat tikisinnissaat, ajornakusoortorujussuulluni, taamaammat ajornartorsiut taanna maannakkorpiaq atuuppoq, Doris Jakobsenip Nunat Avannarliit Killiit Siunnersuisooqatigiiffianut naqissusserpaa.

Nunatsinni nunaqarfinni illoqarfinnilu amerlanerit napparsimasunik ikiuisinnaasunik ilinniarsimasunik amigaateqartut naalakkersuisup panelimi oqallinnermi aamma eqqaavaa.

-Siunertaavoq peqqissaanermi neqeroorutit amerlisarnissaat, nunaqarfinni illoqarfinnilu ilinniarsimasunik amigaateqarnermi unammilligassaqarmat. Assersuutitut toqujartortunut neqerooruteqarsinnaaneq nunaqarfinni, Doris Jakobsen tikkuaavoq.


Paasissutissat amerlanerusut naalakkersuisup allattaanut Rosa Thorsenimut e-mail: rosat@nanoq.gl imaluunniit oqarasuaat +299 553303 sianerluni pissariarineqarsinnaapput