Nunat Avannarliit Killiit Siunnersuisoqatigiivisa ataatsimiinneranni peqataaneq

Kim Kielsen aamma Doris Jakobsen Nunat Avannarliit Killiit Siunnersuisoqatigiivisa ukiut 30-nngortorsiorneranni aammalu ukiumoortumik ataatsimiinneranni peqataapput

Peqqissutsimut Nunallu Avannarliit suleqatigiinnerannut Naalakkersuisoq Doris Jakobsen ulluni 10.-13. aggusti 2015 Nunat Avannarliit Killiit Siunnersuisoqatigiiffiata ukiumoortumik ataatsimiinneranni Runavíkkimi Savalimmiuni ingerlanneqartussami peqataassaaq. Ukiumoortumik ataatsimiinnermi aammattaaq Nunat Avannarliit Killiit Siunnersuisoqatigiiffiata pilersinneqarneraniit ukiut 30-nngortorsiutigineqarnera persuarsiuutigineqassaaq Naalakkersuisut Siulittaasuata Kim Kielsenip peqataaffigisaanik.

Nunat Avannarliit Killiit Siunnersuisoqatigiiffiat Kalaallit Nunaata, Savalimmiut kiisalu Islandip inatsisartuisa akornanni suleqatigiiffiuvoq Nunat Avannarliit Siunnersuisoqatigiiffiannilu suleqatigiinnermut attuumassuteqarluni.

Ukiut 30-nngortorsiutigineqarnerata persuarsiuutigineqarneranut islandimiut præsidentiat Ólafur Ragnar Grímssonnip peqataanissani nalunaarutigisimavaa, nunani pingasuni naalakkersuisut siuttui Nunatsinneersoq, Savalimmiuneersoq Islandimeersorlu peqatigalugit. Kim Kielsen persuarsiornermi oqalugiassaaq oqalugiaatimini ilaatigut nunat pingasut taakkua assigiissutaat oqalugiaatiginiarlugit. ”Ingammik kulturigut inuunermullu isiginnittaatsivut aallaavigalugit Nunat Avannarliit Killiit assigiissuteqaqaat. Nunanut allanut naleqqiullugu pinngortitaq qaninnerullugulu pinngortitami inuuneruvugut,” Kim Kielsen oqarpoq.

Nunat Avannarliit Killiit Siunnersuisoqatigiivisa Nunatsinnut sunniuteqarneranut Naalakkersuisut Siulittaasuat Kim Kielsen oqarpoq: ”Nunat Avannarliit Killiit Siunnersuisoqatigiivisa pilersinneqarneraniit ukiut 30-nngortorsiorneqarnerat oqaluttuarisaanitsinni ataatsimoorfiusumik malunnartitsivoq aammattaaq Kalaallit Nunaat, Savalimmiut Islandillu pingaartumik qanittumillu peqatigiinnerat ersersillugu. Inatsisartunut ilaasortat Nunat Avannarliit Killiineersut ukiut ingerlaneranni suliniuterpassuarnik pilersitsisarsimapput nunani pingasuusuni inuiaqatigiinnut malunnaataasartunik.”

Ukiumoortumik ataatsimiinnermi Naalakkersuisoq Doris Jakobsen, Savalimmiuniit Islandimiillu nunani avannarlerni suleqatigiinnermut naalakkersuisut assigalugit, siunnersuisoqatigiit ilaasortaannut oqalugiassaaq. Oqalugiaammini immikkut ukiut ingerlaneranni nunat avannarliit killiit suleqatigiissimanerat iserfigissavaa.

”Nunat avannarliit killiit suleqatigiinnerata Nunatsinnut malunnaataa arlaleriarluni ersertarsimavoq. Tigussaasumik taaneqarsinnaavoq EU-p puisinut tunngatillugu peqqussutaata aaqqissoqqinneqarnerani suliaq pillugu Nunat Avannarliit Killiit Siunnersuisoqatigiiffiata tapersersuinermikkut pimoorussinermikkullu suliaq maluginiarneqarnerulersissimagaat,” suleqatigiinnermut naalakkersuisoq Doris Jakobsen oqarpoq.

Nunat Avannarliit Killiit Siunnersuisoqatigiiffiat ukiut ingerlaneranni piorsarsimassutsikkut aammattaaq meeqqanut inuusuttunullu tunngasunik suleqatigiinnermi siuttuusarsimavoq. Nunat Avannarliit Killiit Siunnersuisoqatigiiffiat tassaapput 1999-imi Nunat Avannarliit Killiit Meeqqanut Inuusuttunullu Atuagassianut Nersornaataannik aallarniisut. Aammattaaq Nunat Avannarliit Killiit Siunnersuisoqatigiiffiat Nunat Avannarliit Siunnersuisoqatigiiffiat suleqatigalugu inuusuttunut paarlaasseqatigiinnerit sammisarisarsimavaat kiisalu misissuineq ”De Unges Livssyn i Vestnorden” 2000-imeersoq saqqummersissimallugu.

Naalakkersuisoq Doris Jakobsen siunissami nunat avannarliit killiit akornanni suleqatigiinnerup inerisaqqinneqarsinaanerani periarfissaqartoq takorloorpaa.

”Nunat avannarliit killiit suleqatigiinnerata iluani isiginniffiit arlallit takusinnaavakka siunissami allisarneqarsinnaasutut periarfissaqarfiusut. Tamanna peqqinnissaqarfiup iluani atuuppoq. Tassani assersuutigalugu peqqinnissaqarfimmi sulisunik paarlaasseqatigiinnermi nakorsassaaleqinikkut ajornartorsiutigut ikiorniarneqarsinnaanerinut ilippanartoqarpoq,” Naalakkersuisoq Doris Jakobsen naggasiilluni oqaaseqarpoq.

Attavigisinnaasaq: Jurist Maliina L. Lyberth, mobil +45 51 20 38 48 – mlly@nanoq.gl