Illuatungeriit pingasut aaqqissuusseqqinnernik tunngavissiissapput

Naalakkersuisut aaqqissuusseqqinnernik siunnersuutaasa imarisaanni siunertani pingaarnerpaat marluk tassaapput siuarsaanermik pilersitsineq, isumaginninnikkullu anguniagassat. Aaqqissuussinerilli inuiaqatigiinni siamasissumik tunngaviligaanngippata aaqqissuussinernit kissaatigisatut sunniutit takkutissagunanngillat.

Taamaattumik suliffeqarfimmi illua’tungerisat aamma Kanukoka ataasinngornermi aggustip qulingani illua’tungeriittut pingasutut oqallinnissamut Anda Uldumip qaaqquai, tassani aaqqissuussinerit inuiaqatigiinni akuuffigisatsinni siamasissumik tunngaviligaatinniarlugit qanoq ililluta inuiaqatigiit pitsaanerpaamik aaqqissuussaqarfigisinnaanissaa oqaluuserineqassalluni.

Ataatsimiinnermi sammisassarpassuit oqaluuserineqarput – pisortani suliffigisap aaqqissuussaallunilu annertussuserisaanit, ilinniagaqarsimassutsip inissisimaffigisaanik qaffassaanissap pingaaruteqassusaanit, Naalakkersuisut atugarissaarfiusumi aaqqissuussinissamik nalunaarutiginninneranut, aammattaarlu najugaqarnitta inissisimanera pillugu aallarniutaasumik oqallittoqarluni. Sammisat assigiinngikkaluartut suliassaqarfiit ataasiakkaat tamarmik tassaapput maannakkut unammillerfissatta qanoq aaqqiiviginissaasa paasiniarnerannut pingaarutillit.

”Oqallilluarpugut, kattuffiit ilaasortaminnit ulluinnarni inuunerup qanoq misigineqartarneranik, sunillu allannguisoqartariaqarneranik ajornaatsunik siunnersuuterpassuaqarlutik. Aaqqissuussinerit piviusunngortinneqalerpata tassaapput ilisimasassat pingaarutillit ilaliunneqartariaqartut”, Aningaasaqarnermut Aatsitassaqarnermullu Naalakkersuisoq Anda Uldum iluarinnilluni oqarpoq, kattuffiillu unammillerfissaasa ilaannik assersuuteqarluni:

”Naalakkersuisut ataatsimoortitassat isumaliutiginissaat pikkorinneruffigilertariaqarpaat, pilersitallu iluminni sioqqutsillutik naleqqussartassallugit, taamaalillutik sumut tamaannga sammiveqartinneqassanngimmata. Tassaavoq kaammattuut Naalakkersuisuni suleqatigisannut ingerlateqqinniagara”.

Aningaasaqarnermut Aatsitassaqarnermullu Naalakkersuisoq naapertorlugu ingerlassassaq kattuffiit iluarisimaarpaat, aaqqissuusseqqinnermillu suliaqarnermi ilanngunneqarsinnaanertik nuannaarutigalugu.

Ataatsimiinneq tassaavoq ataatsimiinnerit arlallit ukiup takkuttussap ingerlanerani pisussat siullersaraat. Nutaatullu ataatsimiinnerni takkuttussani Aningaasaqarnermut Aatsitassaqarnermullu Naalakkersuisoq aamma peqataasarniarpoq. Taamaalilluni Naalakkersuisut aamma illua’tungeriit pingasut isumaqatiginninniarnerannut peqataasut akornanni Anda Uldum kattussimaffittut atuutissaaq.

Inussiarnersumik inuulluaqqusillunga

Anda Uldum, Aningaasaqarnermut Aatsitassaqarnermullu Naalakkersuisoq


Annertunermik paasisaqarniaruit: Attavigiuk tusagassiorfinnut ataqatigiissaarisoq Martin Christiansen, oqarasuaat angallattagaq 221533