Nivi Olsenip Atualiliiv nuannaarutigaa

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Nivi Olsen-ip nuannaarutigai quppersakkap  ”Atualiliiv” -ip saqqummiunneqarnerani qisuariarnerpassuit. Tamatumunngalu atatillugu Nivi Olsen imatut oqaaseqarpoq:

”Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisunngoramali anguniakkama pingaarnerpaat ilagisimavaat meeqqat atuarfianni ineriartortitsinermik pitsaasumik aallartitsinissaq. Taamaattumillu kommuninik IMAK-millu tamanna pillugu oqaloqateqarnermut piffissamik atuisimavunga, misigisarparalu ataatsimoorluta unammilligassatsinnik naammassinninniarnissamut piumassuseqartoqartoq. Taamaattoq meeqqanut ataasiakkaanut attaveqarfigisassat pingaarnerpaat tassaapput angajoqqaat, aammalu tamanna aaqqiissutissap ilagaa. Taamaammat Atualiliiv pillugu saqqummiineq tassanngaaniit isiginiagassaavoq. Neriuutigaaralu Atualiliiv iluaqutaasinnaasoq meeqqat angajoqqaavisa meeqqat ilikkariartorneranni qitiusumik inissisimanerisa sammineqarnerani, aammalu apeqqutit uani pineqartut pillugit oqallinnermut iluaqutaassasoq, kiisalu iluaqutaasinnaalluni angajoqqaat isumassarsiorneranni paasissutissanillu aallertarneranni, angajoqqaanut meeqqami pitsaanerpaamik tapersersornissaanut periarfissarsiorfittut.”

Nivi Olsen-ip erseqqissarpaa Atualiliiv isigineqassanngitsoq atuarnerup aallartilluarnissaanut tamakkiisumik ilitsersuutitut:

”Siunertaanngilaq Atualiliiv naalagaassasoq angajoqqaat ataasiakkaat meeqqami ilinniarnerani periaaseqarnissaannut. Meeqqat tamarmik immikkooruteqarput, angajoqqaallu asannittut peqataarusuttullu tunngaviupput meeqqap pitsaasumik inuuneqarnerani atuartitaaneranilu. Taamaattumik neriuutigaara Atualiliiv angajoqqaanut isumassarsissutaasassasoq, siunnersuutinilu angajoqqaat namminneq silatuutut isigisatik iluaqutigisassagaat, meeqqaminnullu naleqquttutut isiginngisatik atortarnagit.”

Kiisalu Nivi Olsen-ip oqaatigaa Atualiliiv tassaaginnartoq anguniakkani annertunerusuni alloriarneq siulleq, meeqqat angajoqqaavisa atuarfimmut pingaarutaat eqqarsaatigalugu.

”Suli ingerlaqqillunga qitiutissavara meeqqat angajoqqaavisa meeqqat atuarfiannut tunngatillugu inissisimanerat. Taamaattumillu suliniummik aallartitsisimavunga periarfissanik isumannaariniartunik, angajoqqaat meeqqat atuarfianni atuartuutillit nuna tamakkerlugu oqallinnermi nukittunerusumik inissisimasinnaanerat eqqarsaatigalugu, taamaattumillu misissorpara uagut Namminersorlutik Oqartussani tamatumunnga qanoq tapersersuisinnaanerput.”

Annertunerusumik oqaaseqartoqarnissaanut, Daniel Gottrup attavigiuk uunga +299 499478 immaqaluunniit dago@nanoq.gl

 

 

 

Inussiarnersumik inuulluaqqusillunga

Med venlig hilsen

Daniel Gottrup