Kapisilinniarneq aggustip 15-ianni aallartissaaq

Inuussutissarsiutigalugu aalisartut  sunngiffimmilu aalisartut ukioq manna kapisilittassaat 45 tonsiupput.

Kapisilinniarneq arfininngornermi, aggustip 15-iannit aallartissaaq oktobarip 31-anni unitsinneqassaaq, pisassiissutigineqartulluunniit nunguppata kapisilinniarneq unitsinneqassalluni.

Inuussutissarsiutigalugu aalisartut namminneq nerisassaminnik aamma kalaalimineerniarfinni, suliffeqarfinnut, akunnittarfinnut allanullu tunisassaminnik kapisilinniarsinnaapput. Inuussutissarsiutigalugu aalisartut tamarmik aalisarsinnaanermut akuersissuteqassapput.

Sunngiffimmi aalisartut namminneq nerisassaminnik kapisilinniarsinnaapput. Sunngiffimmi aalisartut aalisarsinnaanermut akuersissuteqarnissaannik maannakkut piumasaqartoqanngilaq, tamannali aappagu piumasaqaataalissaaq.

Pingaaruteqarluinnarpoq kapisilittarineqartut tamaviisa nalunaarutigineqarsimanissaat, tamanna siunissami kapisilinniartarnissamut pingaaruteqarluinnartuummat. Taamaattumik tamanna erseqqissaavigissallugu pingaaruteqarluinnarpoq.

Inuussutissarsiutigalugu sunngiffimmilu aalisartut pinngitsooratik pisaminnik nalunaarutiginnittussaatitaapput, qassusiareersimanerit tamaasa pisatik nalunaarutigisassallugit. Kapisilittarineqartut  Kalaallit Nunaanni Aalisarsinnaanermut Akuersissutinik Nakkutilliisoqarfimmut, KANUAANA-mut sianerlutik qarasaasiakkulluunniit nalunaarutigisassavaat.

Naalakkersuisoqarfiup malittarisassanut nalunaaruteqartarnermullu tunngatillugu paasisitsiniaanerit annertusiniarpai pitsaanerusumik nalunaarutiginnittalernissaq qulakkeerniarlugu, soorlu aamma KANUAANA-p kapisilinniarfiup nalaani nakkutilliineq annertusiniaraa.

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi immikkoortortaqarfimmi pisortaq. E-mail: emanuel@nanoq.gl