Qeqertarsuatsiaanni innuttaasunik ataatsimiititsineq

Naalakkersuisunut siulittaasoq Kim Kielsen Aalisarnermut, Piniarnermut Nunalerinermullu Naalakkersuisoq Karl-Kristian Kruse aamma Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq peqatigalugit marlunngornermi 28. juli 2015-imi Qeqertarsuatsiaani innuttaasunik ornigarneqarluartumik ataatsimiititsivoq.

Innuttaasunik ataatsimiititsinissaq sioqqullugu Naalakkersuisunut siulittaasup ilaasortallu marluk nunaqarfiup siulersuisuini ilaasortat najuuttut – siulittaasoq Konrad Boye aamma ilaasortaq Jonathan Jakobsen – paasissutissiiviusumik ataatsimeeqatigaat.

Qeqertarsuatsiaaniinneranni Konrad Boye-p tikeraat Royal Greenlandip tunitsivianut tunisassiorfianullu takornariartippai. Tamatuma kingorna Naalakkersuisunut siulittaasoq ilaasortallu marluk utoqqaat angerlarsimaffiannut neriartorput.

Ullumikkut Qeqertarsuatsiaani innuttaasut 200-t missaanniipput. Innuttaasunit 40-t missarpiaat innuttaasunik ataatsimiititsinermut takkupput.

- Ataatsimiititsinitsinnut innuttaasut taama amerlatigisut takkummata nuannaarutigaara. Aammattaaq aasaanera silaginneralu, inuillu amerlasuut aalisariarlutik piniariarlutillu angalanerat eqqarsaatigalugu. Aamma innuttaasunik ataatsimiititsinermi tunniusimanerujussuaq apersuerusunnerujussuarlu nuannaarutigaara. Maluginiarpara immikkoortut assigiinngitsut, innuttaasut ataatsimiitinneqarneranni oqallisissatut akineqartussatullu qaqinneqartut 25-t missaanniittut. Ilaatigut aalisarnermut najukkamilu tunisassiornermut, Qeqertarsuatsiaani innuttaasut angallannikkut sullinneqarnerinut, ineqarnermi pissutsinut, suliassaqarnermut utoqqalinersiutinullu tunngasuupput, Naalakkersuisut siulittaasuat Kim Kielsen oqarpoq.

Ataatsimiinnermi Naalakkersuisunut siulittaasup ilaasortallu marluk qulequttat, nunaqarfimmi innuttaasunut immikkut soqutiginaatillit ilisimatitsissutigai – taakkununngalu aalisarnermut periarfissat, aatsitassanik ujarlernerit suliffissaaleqinermillu akiuiniarneq ilaatinneqarput.

Naalagaaffeqatigiit Qeqertarsuatsiaani ataatsimiinnissaat
Kiisalu Naalakkersuisunut siulittaasup ilisimatitsissutigaa, aggustip qaammataani naalagaaffeqatigiit ukiumoortumik ataatsimiinnerannut atatillugu statsministeri aammalu Savalimmiuni lagmandi ilagalugit Qeqertarsuatsiaanut tikeraarnissani naatsorsuutigalugu. Naalagaaffeqatigiit ataatsimiinnerat aggustip ulluisa 25-anni True North Gems Aappilattoq-p rubinisiorfiani safirisiorfianilu, Qeqertarsuatsiaat eqqaanniittumi pissaaq.

Naalakkersuisunut siulittaasup Naalakkersuisuniillu aallartitat innuttaasunik ataatsimiititsinermi tikilluaqquneqarluarnertik, aammalu Naalakkersuisuni ilaasortat atorfillillu malittaasut nuannersumik alutornartumillu tikeraarsimaarnerinut nunaqarfimmi siulersuisut aaqqissuussillutik ikiuussimaneri qujamasuutigaat.