Karl-Kristian Kruse: Aalisakkanit sinnikut atorluarneqassapput

- Aalisakkanik tunisassiornermi sinnikut pilersaarutip atorluarneqarnissaannut tunngavissaqarnersoq Naalakkersuisunit assut soqutigineqarpoq. Taamaammat suleqatigiissitaliornialerpugut naalakkersuisoqarfinnit attuumassuteqartunit, taamatullu aalisarnermik inuussutissarsiutilinnit ilaasortalimmik, Aalisarnermut, Piniarnermut Nunalerinermullu Naalakkersuisoq, Karl-Kristian Kruse, Atlantikup avannaani nunat aalisarnermut ministeriisa Maltami ukiumoortumik ataatsimiinnerinut peqataanermini oqarpoq.

- Suleqatigiissitap tunisassiassanit sinneruttut nunatsinni aalisarnermit amerlassusii paasiniassavai, tunisassianik ineriartortitsinissamut sunik periarfissaqarnersoq misissussallugu aamma qanoq iliorluni inatsisinut tunngatillugu tunngavissanik pitsanngorsaasoqarsinnaanersoq. Tamatumani siunertaavoq inuussutissarsiortut erseqqissumik paasiniassammassuk tunisassiat sinnikuinik iluaquteqalernissaq periarfissaqarnersoq, Karl-Kristian Kruse erseqqissaavoq.

Atlantikup avannaani nunat aalisarnermut ministerii qeqertami Maltami ataatsimiinnertik juulip 15-ianni 2015-imi aallartippaat, ataatsimiissutaasa qulequtaat tassaalluni Atlantikup avannaani pisuussutinit imarmiuusunit eqaatsumik aningaasarsiulernissaq.

 

Ataatsimiinnermi nunat peqataatitaqartut, tassaasut Savalimmiut, Norge, Rusland, EU, Island aamma Canada. (NAFMC – North Atlantic Fishery Minister Conference). Ataatsimiinnermi qulequtarineqartoq tunngavigalugu nunat saqqummiussaqartarput, saqqummiussat pillugit kingorna oqaluuserineqartarlutik.

 

Atlantikup avannaani nunat aalisarnermut ministeriisa ataatsimiinnerini pituttuisumik isumaqatigiissusiortoqarneqarneq ajorpoq, ministerilli isummaminnik saqqummiisinnaasarput oqallittoqartarlunilu.

Ataatsimiinneq ataatsimut nalunaaruteqarnermik juulip 17-ianni naggaserneqarpoq, nunat peqataatitaqartut aalisarnermut tunngasunik isummaminnik saqqummiussaqarlutik.

Ataatsimiinnermi Naalaakkersuisuni ilaasortaq Karl-Kristian Kruse nunat ataasiakkaat aalisarnermut naalakkersuisuinik aalisarnermut tunngasunik ataatsimeeqateqartarpoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi immikkoortortami pisortaq, Emanuel Rosing. Mail: emanuel@nanoq.gl.