Eqqagassat pillugit ilisimasaqarnissaq

Namminersorlutik Oqartussat, kommunit aamma KTI, Saviminilerinermut Ilinniarfik ataatsimoorlutik eqqagassalerinermut suliassaqarfiup iluani Kalaallit Nunaanni ilinniarnissamut periarfissamik nutaamik pilersitsipput. Nutaatut eqqagassalerinermi teknikeritut ilinniartitaaneq neqeroorutigineqarpoq.

Eqqagassalerinermut teknikeritut ilinniartitaaneq nutaaq taanna, eqqagassanik pitsaanerusumik passussisarnissap qulakkeernissaanut aammalu nunatsinni avatangiisinut sulliviit sunniuteqarluarnerusumik ingerlanneqarnissaannut, tunngatillugu pingaaruteqarpoq. Tamatuma saniatigut tassani sulisut eqqagassalerinermik suliaqareersut pikkorissarnissaat aammalu piginnaasaqarnerminnut allagartaqalernissaat ajornarunnaarsinneqassaaq.

”Ikuallaavinnik ingerlatsinermi aammalu eqqagassanik navianartunik tigooqqaavinni ilinniarsimasunik sulisoqarnissamik annertoorujussuarmik pisariaqartitsillutik kommunip oqariartuutigaat, taamaattumik nutaatut eqqagassalerinermut suliassaqarfiup iluanerpiaq ilinniartitaanermik neqerooruteqarnissaq iluatsimmat nuannaarutigisorujussuuara”, oqarpoq Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko

Ilinniartitaaneq nutaaq taanna assartugalerisutut (terminalmedarbejder) ilinniartitaanermut, KTI, Saviminilerinermut Ilinniarfimmi neqeroorutigineqareersumut, nangitsivissatut atorneqassaaq. Assartugalerisutut ilinniarneq ukiunik 1½-inik sivisussuseqarpoq, tamatuma kingorna eqqagassalerinermi teknikeritut immikkut pikkorissarluni ilinniarneq suli aamma ukiunik 1½-inik sivisussuseqarluni. Taamaalilluni eqqagassalerinermut teknikerit naammassisut siulliit 2018-imi ilinniarnerminni naammassissapput.

”Ilinniartitaanermi nutaami tassani ingerlatsinermi sulisut pikkorissut, ullumikkut eqqagassalerinermik suliaqareersut, suliassaqarfimmi ilisimasaminnut uppernarsaateqalernissaat ilisimasaminnillu annertusaanissaat, periarfissaqartinneqalissaaq. Eqqagassalerinermut teknikeritut ilinniartitaaneq taamaalilluni amerlanerusut piginnaasaminnik uppernarsaammik allagartaqalernissaannut aqqutissiuussisinnaavoq. Tamanna qaffasinnerusunik aningaasarsiaqalernermik, taamaalillunilu aamma sulisunik aalajaannerusumik attassititsinermik malitseqarsinnaavoq, tamannalu avatangiisitsinnut peqqissutsitsinnullu iluaqutaasumik ataavartumik pitsanngorsaanissamut tunngatillugu pingaaruteqarpoq.” oqarpoq Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko.

Eqqagassalerinermi teknikerit nutaat taakkua ilaatigut uuliakunik aamma akuutissanik uummaatsunik igitassanik passussinissaq, eqqagassalerinermut oqartussaasut piumasaqaataat, atoqqiineq aamma eqqakkanik passussinermut tunngatillugu isumannaallisaaneq ilinniassavaat. Tamatuma saniatigut ilinniartut immikkut ilinniagassamik toqqaassapput, assersuutigalugu tassaasinnaalluni pujuliornernik saliineq imaluunniit ikuallaavinnik minnerusunik ingerlatsineq aserfallatsaaliuinerlu. Qulequttat marluusut tamarmik eqqagassalerinermut suliassaqarfimmi Kalaallit Nunaanni unammilligassanut tunngassuteqartut.

”KTI, Saviminilerinermut Ilinniarfimmut, KANUKOKA-mut, kommuninut minnerunngitsumillu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik qutsavigerujussuarpakka. Tamarmik annertoorujussuarmik suliniuteqarsimanngippata eqqagassalerinermut teknikeritut ilinniartitaaneq piviusunngorsimanavianngikkaluarpoq, ”oqarpoq Naalakkersuisoq Mala Høy Kúko.

Annertunerusunik paasisaqarusunnermi attaveqarfigineqassaaq Naalakkersuisoqarfimmi pisortaagallartoq Mette Skarregaard Pedersen tlf: +299345122 e-mail: mesp@nanoq.gl