Issittup imartaani aalisarneq

Stemningsbillede

Issittumi naalagaaffiit sineriallit tallimaasut ”Arctic 5” Issittup imartaani aalisarneq pillugu nalunaarut atsioqqammerpaat, tassuuna issittup imavittaani malittarisassiugaanngitsumik aalisarnerup pinngitsoortinneqarnissaa anguniarneqarpoq.

Issittumi naalagaaffiit sineriallit tallimaasut issittup imartaani malittarisassiugaanngitsumik aalisarnerup pinngitsoortinnissaa pillugu nalunaarut atsioqqammerpaat. Atsioqatigiinneq 16. juli 2015-imi Oslomi aallartitat atsioqatigiinneratigut pivoq.

Naalagaaffiit sineriallit  siunissami issittup imartaani aalisarneq pillugu ataatsimiinnissaat USA-p isumassarsiaraa, kingullermik februar 2014-imi Nuummi ataatsimiinnermi oqallisigineqarnerani peqataasoq, illua'tungeriit naalagaaffiit sineriallit isumaqatigiissusiornissamut periarfissat pillugit oqallisigaat oqaasertaliorneqarneralu isumaqatigiissutigalugu.

Naalagaaffiit sineriallit tallimaasut isumaqatigiissutigaat siunissami issittup imartaani aalisarneq mianersortumik tunngaveqarluni ingerlanneqassasoq.

Suliaq taanna maanna nalunaarutiliortoqarneranik kinguneqarpoq ilaatigut immikkoortunik makkuninnga imaqartoq:

  • issittup imartaani aningaasarsiutigalugu aalisarneq, isumaqatigiissut nunani tamalaani periaatsinik nutaaliaasunik malinnittoq kattuffiillu imartanut pineqartunut aqutsisoqarfiusut naapertorlugit taamaallaat pisinnaasoq,
  • ilisimatuussutsikkut misissuinernut ataatsimut pilersaarut,
  • ataqatigiissakkamik nakkutilliineq alapernaarsuinerlu,
  • aningaasarsiutiginagu aalisarneq tamarmi ilisimatuut siunnersuinerannik tunngaveqassaaq, paasissutissallu tassanngaanneersut avitseqatigiissutigineqartassallutik.

Aalisarnermut, Piniarnermut Nunalerinermullu Naalakkersuisoq Karl Kristian Krusep oqaatigaa:

”Issittumi naalagaaffiit sineriallit tallimaasugut aalisarneq sunaluunniit mianersortumik tunngaveqarluni ingerlanneqarnissaa nungusaataanngitsumillu aalisarnerup aallaavittut ingerlanneqarnissaa pillugu isumaqatigiissuteqarsinnaagatta nuannaarutigaara. Naalagaaffinni sinerialinni tallimaasuuni innuttaasut akuutinneqarnerat tunngavigalugu isumaqatigiissutip uuma atortuulersinneqarnissaa pingaartipparput taamatuttaarlu isumaqatigiissummi atugassarititaasunik nunat allat atortuulersitsinissaannik kaammattorusuppakka".

 

Paasissutissat sukumiinerusut pissarsiariniarukkit immikkoortortaqarfimmi pisortaasoq Emanuel Rosing +299 345332-ikkut attavigineqarsinnaavoq.