Kangiani Illorsuaq pillugu isumaqatigiissut inissippoq

-illunik titartaasartunik unammisitsisoqalerpoq.
Kalaallit Nunaanni Ilulissat eqqaanni Kangiani Illorsuaq nutaaq pillugu suleqatigiinnissamik isumaqatigiissut atsiorneqarpoq, illunillu titartaasartunik unammisitsisoqalerluni. Ilulissat eqqaanni kajungernartitap nutaap tungaanut pingaarutilittut alloriarnerupput, taassuma sumiiffiup oqaluttuarisaanera silallu pissusaata allanngornerisa pingaaruteqassusaat paasissutissiivigissallugit.

Qaasuitsup Kommunia, Namminersorlutik Oqartussat aamma Realdaniap kangerluup sermip iigartarfillup Kangiata eqqaani, nunarsuarmi kingornussassanut UNESCO’p allattugaataanut ilanngunneqarsimasumi, Ilulissat avannaanni Kangiani Illorsuassaq takkuttussaq pillugu suleqatigiinnissamik isumaqatigiissut atsioqqammerpaat.

Kangiani suliniutip nunarsuarmi kingornussassaqarfiup naleqassusia annertusissavaa, tamannalu ilutigalugu suliffiussaaq pissanganarlunilu kajungernartoq. Kangiani Illorsuaq kangerlummut sermip iigartarfilimmut, aammalu Ilulissanut takornariat tikittagaattut assorsuaq neriunartortaqartitsissasoq nalilersorneqarpoq. Ukiut tamaasa illorsuarmik tikeraat 17.000-it takusaasarnissaat naatsorsuutigineqarpoq. Najukkami innuttaasunut aammalu nunat tamalaanit silap pissusaanik ilisimatusartunut, naalagaaffinni siulersuisunut allanullu Ilulissanut tikeraarajuttartunut naapittarfittut atorneqassaaq.
Illorsuaq takornariartarfissaq illoqarfiup kangerluullu akornanni nunatami inissinneqassaaq – sumiiffimmi assissaqanngitsumi, nunarsuarmi silap pissusaata allanngornerisa erseqqissunik takussutissiiffianni. Illorsuup sumiiffiup oqaluttuarisaanera, ineriartornera aamma pingaaruteqassusia oqaluttuarissavaa – ilaatigullu silap pissusaata allanngornerisa sunniutai pillugit oqaluttuassaaq. Kangiata Illorsuarpiaata saniatigut illoqarfiup illorsuullu akornanni angalaffiusinnaasumik nutaamik aqqusiortoqassaaq.

Illunik titartaasartunik unammisitsisoqalerpoq
Tamaani pinngortitamik ataqqinnilluni sunniivigeqatigiillunilu illumik naammaginartumik angissuseqartumik sanaartuisoqarnissaq Kangiani Illorsuassami kaammattuuteqartoqarpoq. Saniatigut anguniagaq tassaavoq Ilulissat takornarianut kajungernartuunerannik tapersersuisutut illunik titartaariaatsimik, saqqummersitanillu nunarsuarmi pitsaanerpaanut sanilliunneqarsinnaasunik atuilluni illup pilersinnissaa.
Aallartisarneqaqqammersumi nunat tamalaani illunik titartaasartunik unammisitsinermut atatillugu iluseritinneqartussap qanorpiaq innissaa aalajangerneqassaaq. Suliniummut suleqatigiit unammisitsinermut ilaliullugu sumiiffinnik asseqanngitsumik paasinnittarnermikkut tamarmik piginnaaneqartunik nunat tamalaani suleqatigiittartut pingasut sioqqutsisumik qaaqquneqarnissaat aalajangiussimavaat. Sumiiffimmi sanaartorfiusussami avatangiisut pinngortitarlu sakkortulluinnartumik aallaaveqarlutik suliaqartarnerannik tamanna isumaqarpoq. Suleqatigiittartut qaaqqusat tassaapput:
• Studio Olafur Eliasson, Berlin
• Rintala Eggertsson Architects, Oslo
• Kengo Kuma and Associates, Tokyo/Paris

Nunat tamalaani illunik titartaasartut unammisinnerannut peqataaniarluni nalunaarfissamut 1. september killissaritinneqarpoq, pilersaarutillu malillugit inaarutigisatut ajugaatinneqartoq 2016-imi juunip qaammataani tamanut saqqummiunneqassaaq.

Oqaaseqaatit
Qaasuitsup Kommuniani borgmesteri Ole Dorph Kangiani Illorsuaq pillugu imatut oqaaseqarpoq:
”Takornariartitsinermik kissaatigisatut siuarsarnermik tapersersuisutut Kangiani Illorsuaq Ilulissanut Qeqertarsuullu Tunuanut kajungernartuni ilassutinngussaaq.”
Kalaallit Nunaanni Inuussutissarsiornermut, Suliffeqarnermut, Niuernermut Nunanullu Allanut Tunngassuteqartunut Naalakkersuisup Vittus Qujaukitsup ilassutigaa:
”Nunap immikkoortuini tikeraarneqartarfissani arlaliusuni Kangiani Illorsualiornerup siulliulernera qilanaaraara. Nunap immikkoortuini tikeraartarfiliornerit ukiamut Naalakkersuisut takornariartitsinermik periusissiamik saqqummiussinissamik anguniakkat pingaarutillit ilagaat. Avataanit aningaasaliisartut suleqatigalugit pisortat suliniutaannik annertuunik aallartisaasoqarsinnaaneranut Illorsuaq aamma kusanartumik takussutissaavoq.”
Realdaniami pisortat qullersaat Jesper Nygård oqarpoq:
”Silap pissusaata allanngorneri takuneqarsinnaallutillu malugisassaapput, Ilulissanilu kangerlummi sermip iigartarfittalimmi tamakku erseqqissumik takusassaapput. Taamaattumik najugaqartuusunut tikeraartuusunullu ajornartorsiorfik pingaarutilik tamanna paasisitsiviginiassallugu sumiiffik tamanna piukkunnartuuvoq. Paasisitsiniaanissamut timitalittut sinaakkutissat, sumiiffimmi assissaqanngitsumik avatangiisiusunik pitsaanerpaamik sunniivigeqatigiinniartussat nassaariniarnissaat pissanganassaaq.”

Aningaasaqarneq
Illorsuup sanaartornissaanut, saqqummersitsivissaq ilanngullugu aningaasartuutit tamakkiisut 108 mio. kr.-ussasut missiliuutigineqarpoq.
Nunatta tungaanit 23 mio. kr.-nik annertussusilimmik aningaasaleeqataanissamut tapiissutissat pilersinneqarnissaat tunngavigalugit Kangiani Illorsuarmut Realdania 75 mio. kr.-nik tapiissuteqassaaq. Kommunip namminersorlutik oqartussat akornanni suleqatigiilluni aningaasaliisartutut oqartussaasut aqqutigalugit aningaasat pissarsiariniarneqassapput.
Piffissami matumani illumorpiaq attaveqarfimmullu aningaasartuutissat tamarmik inissipput. Aningaasaliissutit sinneri, saqqummersitassartaanut tunngasut aningaasaateqarfinnit assigiinngitsunit pissarsiariniarneqarnissaat sulissutigineqarput.

Illorsuup sanaartornissaanut, saqqummersitsivissaq ilanngullugu aningaasartuutit tamakkiisut 108 mio. kr.-ussasut missiliuutigineqarpoq. Nunatta tungaanit 23 mio. kr.-nik annertussusilimmik aningaasaleeqataanissamut tapiissutissat pilersinneqarnissaat tunngavigalugit Kangiani Illorsuarmut Realdania 75 mio. kr.-nik tapiissuteqassaaq. Kommunip namminersorlutik oqartussat akornanni suleqatigiilluni aningaasaliisartutut oqartussaasut aqqutigalugit aningaasat pissarsiariniarneqassapput. Piffissami matumani illumorpiaq attaveqarfimmullu aningaasartuutissat tamarmik inissipput. Aningaasaliissutit sinneri, saqqummersitassartaanut tunngasut aningaasaateqarfinnit assigiinngitsunit pissarsiariniarneqarnissaat sulissutigineqarput.

Attaveqarfissat:
Inuussutissarsiornermut, Suliffeqarnermut, Niuernermut Nunanullu Allanut Tunngasunut Naalakkersuisoq Vittus Qujaukitsoq, immikkoortoqarfimmi pisortaq Isak Nielsen Kleist aqqutigalugu, +299 34 50 00
Borgmester Ole Dorph, pisortat qullersarigallagaat Hans Eriksen aqqutigalugu, +299 94 78 02.
Realdania: Suliniummut pisortaq Lars Autrup, +45 29 69 52 12