Avatangiisinik pitsannguinissamut atortunut 10 mio.-t

Pinngortitamut, Avatangiisinut Inatsisinillu Atuutsitsinermut Naalakkersuisoq kommuninut avatangiisinut teknologiimut atortunik sananissamut pitsannguinissamullu tapiissuteqarpoq.

2015-imut aningaasanut inatsimmut ilagitillugu Naalakkersuisut avatangiisinik pitsannguinissamut atortunut 14,4 mio. koruuninik immikkoortitsipput. Taakkunannga 10 mio. koruunit kommunini avatangiisinut atortunik pitsannguinissamut tapiissutitut tunniunneqartussanngorput. Aningaasat ilaatigut illoqarfinni annerni arfinilinni ikuallaaveqarfinnik teknikkikkut misissuinissamut atorneqassapput. Teknikkikkut misissuinerit pigineqalerpata, kommunit siunissami ungasissumi pitsaanerusumik aserfallatsaaliuinissaq aammalu ikuallaaveqarfinni pisariaqartinneqartunik pitsannguinissaq, taamaalillunilu ikuallaaveqarfiit mingutsitsinnginnerulernissaat qulakkeersinnaalissavaat. Ullumikkut sumiiffinni amerlasuuni ikuallaaveqarfinnit dioxin aniasoq qaffasipallaarujussuarpoq, tamannalu peqqissutsimut avatangiisinullu annertuunik sunniuteqarpoq. Taamaattumik ikuallaaveqarfinniit putsup aniasup pitsaanerusumik naleqqunnerusumillu suliarineqarsinnaanissaa anguniarlugu sulinissaq pingaaruteqarpoq.
Taakku saniatigut suliniutit assigiinngitsut arlallit, tamarmik immikkut eqqagassalerinermik suliaqarfiusut tapersersorneqarput. Qaanaami Qasigiannguanilu eqqakkanik ulorianaatilinnik tigooraaviliornissamut tapiissuteqartoqarpoq. Atortut taakku pigineqalerpata, Naalakkersuisut Eqqagassalerinermut Pilersaarutaanni tulleriiaarinerit pingaarutillit naammassineqassapput.

”Illoqarfiit tamarmik tigooraavilersorneqarnissaat qangaaniilli pingaarnertut anguniagaavoq, taamaattumillu illoqarfiit kingulliit ilaalermata naammagisimaarnarpoq – taamaalillutalu anguniagaarput angussavarput. Naalakkersuisuni kommunit eqqagassalerinermi ikiorsersinnaagatsigit nuannaarutigaarput, aammalu suliniutit assigiinngitsut, maanna aallartinneqartussat malinnaaffiginissaat qilanaaraarput. Tamatumunnga peqatigitillugu erseqqissaatigissavara, kommunit kommunini atortunut aningaasalersuinissamut peqataanissaat piumasarineqarmat,” Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Suliassat tapiiffigineqartussat sinneri tassaapput Qaqortumi ikuallaavimmi aserorterissummik, Maniitsumi Sisimiunilu containerit asiutitsivinnik, Kommuneqarfik Sermersuumut eqqakkanik ikuallanneqarsinnaasunik ballenut naqitsissummik aamma Ilulissani Aasiannilu igalaaminernut saviminernullu katersuiveqarfimmik pisinissaq. Suliassani taakkunani ilaatigut sulisut eqqagassanik ulorianaatilinnik passussisarnerisa ajornannginnerulernissaa isumannaannerulernissaalu, Qaqortumi ikuallaaviup pitsaanerusumik ingerlalernissaata isumagineqarnissaa aammalu Ilulissani Aasiannilu eqqakkanik immikkoortiterinerup pitsaanerulernissaa naatsorsuutigineqarpoq.

Sinneruttut 4,4 mio. koruuniusut ukiup ingerlanerani kingusinnerusukkut agguaaneqarsinnaapput imaluunniit ukiumut aningaasaliiffiusumut tullermut nuunneqarsinnaallutik. Aningaasat Naalakkersuisut eqqagassalerinermut pilersaarutaat naapertorlugit tapiissutitut tunniunneqartassapput, tassanilu suliniuteqarfissat sisamaasut uku salliutinneqassapput:

- Eqqakkanik ulorianaatilinnik passussinermut atortut
- Inissiivinnik nakkutigisanik ilusilersuineq
- Anartarfilerinermut atortut
- Ikuallaaviit


Paasissutissanik allanik paasiniaaffigineqarsinnaavoq:

Konstituerede departementschef Mette Skarregaard Pedersen tlf: +299345122 e-mail: mesp@nanoq.gl