Inuit Sila Nunani Avannarlerni Ministerit Siunnersuisoqatigiivinit tapersersorneqarpoq

Stemningsbillede

Inuit Sila Nunani Avannarlerni Ministerit Siunnersuisoqatigiivinit tapersersorneqarpoq - puisinniarneq inuillu issittumi ikittunnguakkuutaarlutik sinerissami najugallit pillugit paasisitsiniaaneq

Puisit pillugit paasisitsiniaaneq Inuit Sila 2015-imi Nunani Avannarlerni Ministerit Siunnersuisoqatigiivisa ataanni issittumi suleqatigiinnermut pilersaarummi naalakkersuinikkut tulleriiaarinernut atugassanngortitanit tapiiffigineqartussatut toqqarneqarpoq. Tamanna Danmarkip killeqarfii akimorlugit alloriarnerussaaq siulleq pingaarutilik siunissamilu ungasinnerusumi ilioriusissanut naapertuutissalluni taakkunani pineqarmat suliniut Nunanut Avannarlernut Europallu sinneranut siammarneqassasoq.

Nunat Avannarliit Kalaallit Nunaannut puisillu amiinut Kalaallit Nunaanneersunut pingaaruteqarlutik tuniniaaviupput, taamaammat Inuit inuuniarnerminni atugarisaannik ileqquinillu oqaluttuarinnittarneq piorsarsimassutsimut inuussutissarsiornermullu tunngatillugu pingaaruteqarluinnarpoq.

Ukiuni kingullerni pingasuni Naalakkersuisut KNAPK suleqatigalugu puisit pillugit paasisitsiniaaneq Inuit Silap sulinera tapersersorsimavaat, Kalaallit Nunaat aamma Danmarki ukkatarineqarsimalluni. Suliaq Danmarkimi annertuumik allannguuteqartitsisimavoq, politikkikkut eqqumaffigineqarluni tusagassiorfinnit sammineqarluni aamma inunnit tamanit soqutigineqarluni.

2009-imi EU-p tunisassiat puisineersut nioqqutigineqartarnerat europamiut puisinniartarnermut ernumanerat pissutigalugu inerteqqutigilerpaa. Peqqussumili ajornartitaanngilaq puisinit Inunnit inuiaqatigiinnillu nunap inoqqaavinit allanit pisarineqartunit tunisassiat ilaatinneqannginnissaat. Inerteqquteqarneq, naak inuiaqatigiit inuit pitsaanngitsumik sunnerneqarnissaat anguniagaanngikkaluartoq, Kalaallit Nunaannut ilungersunartunik kinguneqarsimavoq, tassami Great Greenland A/S-imit tunisinermit paasissutissatigut takutinneqarmat, Inuit ilaatinneqannginnerat piviusumik atuutinngitsoq. Ilaatigut Inuit tunisassiaanut puisineersunut EU-mi atuisut tatiginnittuunngillat.

Inuit Silap suliassaraa piniartut atugarisaasa nunatsinnilu ileqqutta paasineqarnerunissaat nukittorsaaqataaffigissallugu taamatuttaaq puisinniarneq puisinillu tunisassianik niuerneq inatsisit malillugit inuussutissarsiutaammata. Kalaallit puisinniartartut taakkulu piginnaatitaaffiisa inuuniarnerminnilu atugarisaasa tapersersorneqartuarnissaannut sulissutigineqarnissaannullu Nunani Avannarlermiut tapersersuinerat qitiulluinnarluni pingaaruteqarpoq.

 

Paasisaqarnerorusuttut attavigisinnaavaat immikkoortortami pisortaagallartoq Nette Levermann, oqarasuaat +299 34 53 44 imaluunniit Inuit Silamit Ole Ørum oqarasuaat + 45 26 14 28 14.