Nunat Avannarliit Kalaallit Nunaanni puisinniarneq tapersersorpaat

Puisit amiinit tunisassiat

Nunat Avannarliit suleqatigiinnermut ministeriisa Inuit Silap nunani Østersømut sinerialinni taamatullu Finlandimi, Ålandimi Sverigemilu puisit amii pillugit paasisitsiniaaniarluni pilersaarutaa 500.000 koruuninik aningaasaliiffigaat.

Nunat Avannarliit ministeriisa marsip qaammataani ataatsimiinnerminni Nunat Avannarliit Ministeriisa Siunnersuisoqatigiivisa issittumut tunngatillugu naalakkersuinikkut ingerlatsinerat oqallisigaat. Ministerit isumaqatigiissutigaat suliniutit Nunat Avannarliit Ministeriisa Siun-nersuisoqatigiivisa issittumut tunngatillugu naalakkersuinikkut ingerlatsinerata ilumut malitseqartitsineqarneranut takussutaasussat ingerlanneqalissasut. Maannakkut aalajangiisoqarpoq puisit amiinut tunngatillugu paasisitsiniaaneq KNAPK-p Inuit Sila aqqutigalugu ingerlataa tapersersorneqassasoq.

Sulissuteqarniarnermi pineqarpoq nunani Østersømut sinerialinni, Fin-landimi, Ålandimi taamatullu Sverigemi puisit amiisa pinngortitameersunit tunisassiatut Kalaallit Nunaanni puisinik piujuartitsinissamik tunngaveqarluni pisarineqartuneersut atorneqarsinnaanerisa paasisitsiniutigineqarnissaat.

Puisit amiisa Kalaallit Nunaanneersut tunineqartartut kisitsisitaasa takutippaat EU-mut puisit amiisa eqqussoqqusaannginnerannut inuit ilaatinneqanngikkaluartut Europami puisit amiinik tuniniaaviit aserorneqarnerat pinngitsoortinneqarsinnaasimanngitsoq. Inuit Silap suliniutaata tapersersorneratigut Nunat Avannarliit ministeriisa takutippaat Nunani Avannarlerni pinngortitami isumalluutit piujuartitsinissamik tunngaveqarluni iluaqutigineqarnerat akuersaarneqartoq. Inuit Nunani Avannarlerni najugallit ileqqoraat ammit ulluinnarsiutigalugit atisassatut allatulluunniit atortarlugit. Inuit Silap paasisitsiniaaneratigut erseqqissarneqassaaq puisit amii periarfissatsialassuusut amminit atortussiat pinngortitameersut atorneqartussanngoraangata. ”Puisit amii, atisarissaarumagaanni !”

”Taamatut kalaallit puisinniarnerannut erseqqissumik tapersersuinerup takutippaa Nunat Avannarliit suleqatigiinnerat nunarsuarmioqatitsinnik attaveqartarnitsinnut qanoq pingaaruteqartigisoq, puisinillu sammisaqar-nerup takutippaa taamatut sulinermut suleqataanerput qanoq annertutigisumik naalakkersuinikkut angusaqarfiusinnaatigisoq” Nunat Avannarliit Suleqatigiinnerannut Naalakkersuisoq Doris Jakobsen oqarpoq.

”Marsimi Ilulissani suleqatigiinnermut ministerit ataatsimiinnerata an-gusaqarfiulluarnerata aamma uagut Nunat Avannarliit Ministeriisa Siun-nersuisoqatigiivini danskit siulittaasuutitaqarneranni pilersaarutigineqartut naammassineqarnerannut suleqataasimanitta takutippaat, uagut ministerit siunnersuisoqatigiivisa suleqatigiinneranni tamarmi suleqataalluta najuunnitsigut naalakkersuinikkut suliassartaasigullu aalajangersimasunik pissarsiaqartarsinnaasugut” Doris Jakobsen naggasiivoq.


Annertunerusunik paasisaqarusukkuit sianerfigikkit:
Senorrådgiver Jørgen S. Søndergaard +45 40 34 31 23 imaluunniit Inuit Sila v/ Ole Ørum Nielsen + 45 26 14 28 14