Nunalerineq pillugu Siunnersuisoqatigiit 36-ssaanik ataatsimiippoq

Nunalerineq pillugu Siunnersuisoqatigiit 36-ssaanik Qaqortumi 1. juli 2015 ataatsimiippoq

Siunnersuisoqatigiit ataatsimiinnerminni pingaarutilinnik eqqartukkaminni makku iluatsillugu avammut oqaaseqaatigerusuppaat:

Siullermik minnerunngitsumillu Nunalerineq pillugu Siunnersuisoqatigiit Naalakkersuisut qutsavigiumavai Nunalerineq pillugu Ataatsimiititaliarsuup inassuteqaataannik malitseqartitsillutik immikkut 6 mio. kr.-nik aningaasaliissuteqarmata, taakkualu iluanni makkununnga atorneqartussaallutik:

1. Nersutaasivinnik nutarterineq aserfallatsaaliuinerlu, tassunga ilanngullugit nersutaasiviit naqqi.

2. Savanik piaqqiortussanik pissarsinissaq

3. Narsaatini aqquserngit tallineqarnissaat, narsaatinillu allisaanissaq

4. Illut naatitsiviit amerlineqarnissaat allineqarnissaalluunniit

5. Nukissiuutinik avatangiisinut innarliisinnaanngitsunik atuinerulernissaq.

Nunalerineq pillugu Siunnersuisoqatigiit Naalakkersuisut kajumissaarpai Nunalerineq pillugu Siunnersorteqarfik aamma Kommune Kujalleq qanimut suleqatigalugit savaateqarfinnik qimatsiinnartarneq pinaveersaartinniarlugu malittarisassiuusseqqullugu. Savaateqarfimmik qimatsisoqartinnagu piumasaqaateqalersitsisoqartariaqarpoq uumasuutit qanoq paarineqassanersut qanorlu iliuuseqarfigineqassanersut. Aammattaaq malittarisassiuussisoqartariaqarpoq savaateqarfik qimanneqarneratigut aningaasaqarniarnermut tunngasut qanoq aaqqissuunneqassanersut piginnittussamut nutaamut tunniussisoqartinnagu.

Nunalerineq pillugu Siunnersuisoqatigiit erseqqissumik isumaqarput savaateqarfiit attatiinnarneqassasut annertusarneqarlutillu, taamaasilluni Neqi A/S-mut toqoragassat eqqanaarneqassammata. Taamaasiornikkut savaateqarfiit ingerlaannarnissaat eqqanaarneqassaaq aammalu toqoraaviliaatassanik ikilisaasoqarani.

Nunalerineq pillugu Siunnersuisoqatigiit ilisimatinneqarput umimmaat Nanortallip eqqaanut nunniussat pillugit, aammalu tassunga atatillugu piumasarissallugu Nanortallip eqqaaniittut ikilisarneqassanngitsut pisuussutit iluaqutiginissaannut piffissanngorpat pisassiissutissanik siunnersuusiortoqartinnagu. Nunalerineq pillugu Siunnersuisoqatigiit aammattaaq kajumissaarutigaat uumasut pineqartut takuneqarsimatillugit assinik takussutissanik pissarsisoqartarnissaa.

Nunalerineq pillugu Siunnersuisoqatigiit SPS pilluaqqujumavaat Kalaallit Nunaanni savat islandimiit eqquteqqaarneqarnerisa aammalu savaateqarnerup inuussutissarsiutinngornerata ukiuni 100-nngortorsiornerani. Tamanna tunngavigalugu Kommune Kujallermut, Namminersorlutik Oqartussanut Inatsisartunullu siunissaq ungasinnerusoq eqqarsaatigalugu nutaaliornertalimmik nunaateqarnermut inuussutissarsiutip siunissaa Kalaallit Nunaanni inuiaqatigiinnut iluaqusiisutut isigineqalernissaa.

 

Nunalerineq pillugu Siunnersuisoqatigiit sinnerlugit

Niels Lund
Siulittaasoq