Nuna tamakkerlugu innarluutilinnut sullissivik

Nuna Tamakkerlugu Innarluutilinnut Sullissivimmut nivariarneq siulleq

Pingasunngorneq ulloq 8. Juli 2015 nal. 13.00 Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen Nuna Tamakkerlugu Innarluutilinnut Sullissiviup sananeqarnissaanut nivariaqqaassaaq. Nuna Tamakkerlugu Innarluutilinnut Sullissivik Sisimiuni Gertrud Rask Minde-p aamma eqqartuussiviup nutaap akornanni sananeqassaaq.

Innuttaasut, meeqqat inersimasullu sapinngisaq tamaat namminneq angerlarsimaffimminniinnissaat, imminnut ikiorsinnaanissaat innuttaasullu innarluutillit ataasiakkaat ilinniarnissamut suliffeqarnissamullu periarfissaasa qaffassarnissaat Naalakkersuisut pingaartippaat. Innuttaasut innarluutillit ataasiakkaat naleqquttumik ikiorneqarlutik sungiusarneqarlutillu sapinngisaq tamaat pitsaasumik inuuneqarnissaat tassani siunertaavoq.

Innarluutillit pillugit suliassat kivinneqarnissaat annertuumik pisariaqartinneqarpoq. Taamaattumik innuttaasunut innarluutilinnut, meeqqat inuusuttullu tamaasa, taavalu qanigisaasunut innarluutillillu pillugit sulisunut ilinniarsimasunut atugassamik nutaamik nuna tamakkerlugu innarluutilinnut sullissivimmik sananissaq Naalakkersuisunit pingaartinneqarnikuuvoq. Innarluutilinnut sullissiviup nutaap pilersinneqarneratigut, Nuna Tamakkerlugu Innarluutilinnut Sullissivimmut IPIS ilanngullugu, siunnersuinerit, ilitsersuinerit sungiusaanerillu sumiiffimmut ataatsimut katersuunneqassapput.

Nuna Tamakkerlugu Innarluutilinnut Sullissivik Sisimiuni sananeqassaaq, nunali tamakkerlugu innuttaasunut innarluutilinnut iluaqutaassalluni. Sullissivik sungiusaanernik, siunnersuinernik ilitsersuussinernillu neqerooruteqartassaaq. Tamanna pissassaaq ilaatigut sullissivimmi, aammali innuttaasup illoqarfittut najugarisaani pisariaqartitsiffiusumilu pisassalluni.

Nuna Tamakkerlugu Innarluutilinnut Siunnersuisarfik Qarsoq Tegnestue-mit titartarneqarpoq sanaartornissamullu suliaq tamakkiisoq Permagreen Grønland A/S-imiilluni.

Nuna Tamakkerlugu Innarluutilinnut Sullissivik 2017-imi ammarneqassasoq naatsorsuutigineqarpoq.

 

Paasissutissat:

Ammarneqarnissaa naatsorsuutigineqarpoq: April 2017

Nivariarneq siulleq: 8. juli 2015 nal. 13.00

Aningaasanut inatsimmi aningaasaliissutit: 51,2 mio. kr.

Sullissivimmi neqeroorutit: Innuttaasunut innarluutilinnut, qanigisaasunut sulisunullu ilinniagaqarsimasunut siunnersuineq, ilitsersuineq, sungiusaaneq aamma pikkorissaaq.

Sumiiffik: Sisimiut

Titartaasoq: Qarsoq Tegnestue

Entreprenør: Permagreen Grønland A/S

 

 

Paasissutissat allat, Suliamut aqutsisoq Sara Törnqvist attavigiuk 34 66 46 imaluunniit stor@nanoq.gl. aqqutigalugit