Alaskamit aallartitanik tikeraartoqarneq

Alaskamit aallartitat Alaskami Senatorimit Lesil McGuire-mit siulersorneqartumik ulluni junip 4-nit 11-anut Nuummut tikeraarput. Tikeraarnermi pingaarnertut immikkut siunertarineqarpoq Alaskap Kalaallillu Nunaata inuussutissarsiornikkut suleqatigiinnissap inerisarneqarnissaa.

Alaskamit aallartitat Sisimiuni Nuummilu ataatsimeeqateqarput, tassani Kalaallit Nunaata aatsitassarsiornikkut ineriartornera taamatullu Kalaallit Nunaata issittumi suleqatigiinnermut peqataanera annertunerusumik ilikkagaqarfigerusussimallugu. USA april 2015-mi Issittumi Siunnersuisooqatigiinni siulittaasoqarfik tiguaa, tassanilu Alaska annertuumik sunniuteqarluni inissisimavoq, tamannattaaq Kalaallit Nunaannut ukiuni tulliuttuni marlunni pingaaruteqarluinnarpoq.

Inuussutissarsiornermut aallartitat tamarmiusut Senator Lesil McGuire peqatigalugu tikeraarnerminni Inuussutissarsiornermut, Suliffeqarnermut Nunanullu allanut Naalakkersuisoq Vittus Qujaukitsoq ataatsimeeqatigaat. Ataatsimiinnerni eqqartorneqarpoq inuussutissarsiornermi suleqatigiiffiusinnaasutut periarfissat, taamatullu Issittumi Siunnersuisooqatigiit pingaarnertut aqqutigalugu nunarsuarmioqatigiinnik suleqateqarsinnaaneq.

Junip qulingani Vittus Qujaukitsoq Lesil McGuire-lu illugiillutik ataatsimiipput, tassani pingaarnertut eqqartorneqarluni USA-p Issittumi Siunnersuisooqatigiinni siulittaasuuffeqarnera, tassuunakkullu Issittumi aningaasatigut siuariartornissamut sinaakkutaasinnaasunik pitsaanerusunik eqqartueqatigiillutik. Suleqatigiinnerup annertusarneqarnissaa isumaqatigiissutigineqarpoq, tassani immikkut Issittumi ilisimalersimasat eqqarsaatigalugit peqqinnissaqarnikkut, eqqarsartaatsikkut peqqinneq imminullu toquttarnerup akiorneqarnissaa eqqartorneqarlutik.

Annertunerusumik paasisaqarusukkussi attavigisinnaavarsi: Immikkut Siunnersorti Uiloq Mulvad Jessen, Nunanut Allanut Pisortaqarfik, Mobil nr.: 240453