Aalisarneq pillugu Inatsit naapertorlugu avaleraasartuunik agguaassisoqarpoq

Ukioq manna avaleraasartoortassanik 85.000 tonsinik agguaassisoqarmat sakkortuumik isornartorsiuisoqarpoq, illuatungiliuttunit, NUSUKA-mit aamma KNAPK-mit isornartorsiuisoqarluni. Kingulliit taaneqartut isumaqarlutik avaleraasartoortassanik agguaassineq pissusissamisuunngilluinnarsimasoq.

- Naqissuserlugu erseqqissarusuppara avaleraasartuunik pisassiinerit tamarmik kinaassusersiorani aamma piviusorsiortunik tunngaveqarluni pisimammata, aamma inatsisit naapertoqqissaarlugit pisassiisoqarluni, Aalisarnermut, Piniarnermut Nunalerinermullu Naalakkersuisoqarfimmmi pisortaq, Jørgen Isak Olsen oqarpoq.

NUSUKA aamma KNAPK isumaqarput Aalisarnermut Naalakkersuisoqarfiup  nunaqavissut avaleraasartoorniarnissamut peqataarusunnerat tikilluaqqullugulu ersersinnianngittaraa, tamannalu allanngortilluinnartariaqartoq,  kalaallit periarfissinniarneqassammata.

- Isumaqarpunga nunaqavissunut  ukioq manna avaleraasartoortassanik agguaassinermi nunaqavissut siornamut naleqqiullugu peqataatinneqarnerusut. Ingerlatseqatigiiffiit ikinnerpaamik tallimat sinerissap qanittuani aalisartunit piginneqataaffigineqarput. Umiatsiaararsortut aalisariutiniluunniit aalisartut katillugit ikinnerpaamik 250-it ingerlatseqatigiiffinnut piginneqataapput.

Kattuffiit Arctic Prime Fisheriesimut aamma Malik Seafoodimut avaleraasartoortassiisimaneq isornartorsiorpaat isumaqarlutik,  taakkununnga pisassiisimaneq pinngitsoorani utertinneqartariaqartut, pisassinneqarnerallu pissusissamisoortutut isigineqarsinnaanngitsoq.

Ingerlatseqatigiiffiit avaleraasartoortassinneqarmata inatsisit naapertorlugit pivoq.

 - Erseqqissarusuppara ingerlatseqatigiiffiit pisassinneqarsimasut tamarmik Aalisarnermut inatsit naapertorlugu pisassinneqarmata, piginneqataassutsit amerlanersaat 1/3-lii nunanit allaneersunit pigineqarsinnaallutik. Nunat tamalaaneersut piginneqataaneri akornutitut tamatigut isigisariaqanngillat. Immikkut ilisimasatik aalisartunut nunatsinneersunut nangittussanngorlugit pisinnaasarmatigik, aalisarnerup akilersinnaasumik ineriartorneranut iluaqutaasinnaallutik, naalakkersuisoqarfimi pisortaq erseqqissaavoq.

Naalakkersuisut pingaarnersiuinerminni pingaartitaat tassaavoq avaleraasartoorniarneq amerlanerpaanit aningaasarsissutigineqarnissaa amerlanerpaanillu aamma suliffissaqartitsisuunissaa. Taakku aalisariutinik nunatsinneersunit angusaqarfigineqarluarsinnaapput, nunatsinneersunit nunatsinnullu akileraartartunik inuttaqarpata.

Akileraarnerusarput

Nunatsinni ingerlatseqatigiiffiup aalisariutaataa nunatsinnut akileraarutaat 8,1 million koruuninik amerlanerusarput, aalisariummut nunamut allameersumut nunanit allamiunik inuttalimmut sanilliullugu. Tamanna naatsorsuilluni assersuussinikkut takuneqarsinnaavoq, assersuussinermi qulaarniarneqarluni nunatsinneersoq nunanit allaneersorluunniit Landskarsimut akileraarnerusarnersoq.

- Taamaattumik pissutissaqanngilaq ingerlatseqatigiiffiit nunatsinneersut assuarissallugit, taakkumi Landskarsimut ikigisassanngitsunik aningaasaliisarput suliffissaqartitsilluartuullutillu, Jørgen Isak Olsen erseqqissaavoq.

Naalakkersuisoqarfiup pisortaata eqqumiigilaanngitsuunngilaa kattuffiit avaleraasartuunik agguaassisoqareersorlu naammagittaalliuteqarmata.

Aalisarnermik aallutallit Naalakkersuisoqarfimmit ataasiaannaratik saaffigineqartarput avaleraasartuut pillugit qaninnerusumik suleqatigiumallugit.

Ingerlatseqatigiiffiit avaleraasartoorniartitsisut aamma kattuffiit Naalakkersuisoqar­fimmeersunit ukioq manna arlaleriarlugit ataatsimeeqatigineqartarput.

Ataatsimiinnerni ataatsimeeqataasut naalakkersuisoqarfimmit peqquneqartaraluarput aalisarnerup pitsaanerusumik aaqqissuunneqarnissaanut siunnersuuteqaqqullugit.

NUSUKA kisiartaalluni siunnersuuteqarpoq.

 

- KNAPK-ip avaleraasartoortassat pillugit isumaa paasiuminaatseqaara. Kattuffiup avaleraasartoortassat pillugit sunniuteqarsimasinnaagaluarpoq, avaleraasartoortassat agguaannissaasa suliarineqarnerinut soqutiginnittuusimagaluaruni, Jørgen Isak Olsen oqarpoq.

Naalakkersuisoqarfiup pisortaata aamma eqqumiiginngiitsuunngilaa avaleraasartuut agguaanneqarnerisa nalaani sakkortuumik isornartorsiuisoqarmat Sulisitsisut oqallittunut ilaanngimmat. Sulisitsisunut ingerlatsiveqatigiit ilaasortat avaleraasartoorniartussat taassapput Royal Greenland Pelagic, Arctic Prime Fisheries  aamma Malik Seafood.

- Paasisinnaanngilara Sulisitsisut siulittaasuat, Henrik Leth, avaleraasartoortassat agguaanneqarnerinut atatillugu sakkortuumik oqallinnermut akuunngimmat, ilaasortami soqutigisaannik illersuisaraluaqaluni, Jørgen Isak Olsen oqarpoq.

Sooruna NUSUKA-p aamma KNAPK-p isornartorsiuinerminni Polar Seafood oqaatiginngikkaat, naalakkersuisoqarfimmi pisortaq aperivoq, erseqqissallunilu taanna nunanit allamiunit aamma piginneqataaffigineqarmat.

- Aamma Halibut Greenland aalisartunit amerlaqisunit piginneqateqartoq nunanit allamiunit aamma piginneqataaffigineqartoq erseqqissaassutigiinnarsinnaavara.

Kattuffiit inuit nunatsinnut nunasisimasut avaleraasartuunik aalisarsinnaannginnerarlugit pisinnaanngilaat, tunngaviusumik inatsit naapertorlugu nunaqavissutulli aalisarsinnaatitaammata aamma avaleraasartoorniarsinnaatitaammata.

KNAPK-ip isumaa naapertorlugu nunanit allaneersut nunatsinnut nuussimasut qanoq sivisutigisumik nunatsinneereerlutik aalisarsinnaalissappat, tamatumani aamma avaleraasartoorniarsinnaalissallutik?

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail: jio@nanoq.gl