Mala Høy Kúko ataatsimeersuarnermik ammaasuuvoq

Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko silap pissusaa pillugu ataatsimeersuarnermik ammaasuuvoq

Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko ippassaq, juunip ulluisa aappaanni, nunat tamalaat silap pissusaa pillugu ataatsimiinnerannut, ”Ilulissat Climate Days 2015”-imut, annertuumik piareersagaasumut, ammaavoq, tassungalu peqataasut 180-it sinnerlugit amerlassusillit Kalaallit Nunaata sikuini allannguutit pillugit ilisimasanik kingullernik avitseqatigiinniarlutik katersuussimapput.

"Silap pissusaanut naalakkersuisutut akisussaasuusutut ullumikkut peqataasinnaagama, aammalu inuppassuit tunniusimalluartut qulequtaq pingaarutilik; tassalu silap pissusiata allannguutai, taakkualu inuiaqatigiinnut uatsinnut, ulluinnarni inuunitsinnut siunissatsinnullu  sunniutai pillugit katersuunnerat misigisinnaagakku nuannaarutigisorujussuuara”, Naalakkersuisoq Mala Høy Kúko ammaalluni oqalugiarnermini ilaatigut oqarpoq.

Naalakkersuisup ataatsimiinnermi silap pissusiata allannguutaasa inuiaqatigiinnut uatsinnut ulluinnarnilu inuunitsinnut sunniutaasa aallunneqarnerat pingaaruteqartorujussuartut isigigini oqarpoq: ”Silap pissusiata allannguutai issittumi pinngortitamut najukkatsinnut asseqanngitsumut nutaanik sakkortunerusunillu allannguipput. Kisiannili aamma silap pissusiata allannguutai periarfissanik nutaanik nassataqarput, pisullu ilaanni unammilligassat periarfissanut sangutinneqarsinnaapput”. Assersuutigalugu Naalakkersuisup ilaatigut umiarsuit angallannerat eqqaavaa, tassanilu piffissat sikoqanngiffiusut sivisunerulerneranni aqqutit nutaat ajornarunnaarsimapput. Aamma Kalaallit Nunaata kujataani pissutsit peqqutaallutik naatitsinissaq ajornannginnerulersimavoq.

Silap pissusia pillugu ataatsimiinneq ”Ilulissat Climate Days 2015” juunip ulluisa tallimaat tikillugu ingerlanneqassaaq.

Annertunerusumik paasisaqarusunnermi Allaffimmi pisortaagallartoq Karen Anne Arleth, knar@nanoq.gl, 55 15 85-imut attaveqarfigineqassaaq.