Ilinniartitaanermut Aqutsisoqarfik pisortartaarpoq

Simon Lennert Ilinniartitaanermut Aqutsisoqarfimmi pisortanngorpoq. Ilinniartitaanermut Aqutsisoqarfik 2015-imut Aningaasanut Inatsisip maajimi akuerineqarneratigut pilersinneqarpoq inissinneqarlunilu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup ataaniittussanngorlugu.

Simon Lennert 51-inik ukioqarpoq, maannalu KANUKOKA-mi siunnersortaanertut atorfeqarluni. Simon Ilinniarfissuarmi ilinniartitsisutut ilinniarsimavoq, taamanilu Danmarks Pædagogiske Universitet-iusimasumi qulequtaqarluni sulinermi ilinniarfiillu aaqqissugaanerannik inerisaanermik diplomitaarniarluni soraarummeersimalluni. Simon nunaqarfinni atuarfinni pisortaasarsimavoq Sisimiuni Nalunnguarfiup Atuarfianilu aamma pisortaasimalluni.

Simon Lennertip taamaalilluni atuarfik pillugu Inatsisartut inatsisaata piviusunngortinnissaa pisortatut akisussaaffigisussanngorpaa. Simon Lennertip aamma meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisaata, efterskolit pillugit Inatsisartut inatsisaata aamma tunngaviusumik atuarfiit namminersortitat angerlarsimaffimmilu atuartitaaneq il.il. pillugit Inatsisartut inatsisaata piviusunngortinnissaat akisussaaffigisussanngorpai.

 

Inussiarnersumik inuulluaqqusillunga

Mikael Kristensen
Naalakkersuisoqarfimmi pisortaq