Kalaallit Nunaat EU-mi – Puisit amii pillugit peqqussut pillugu ataatsimiinnerat

Puisit amiinit tunisassiat Kalaallit Nunaata Sinniisoqarfia Bruxelles-mi juunip 23-iani isumasioqatigiissitsivoq taasaminik ”Kalaallit Nunaat Issittumi – Assigiinngiiaartunit aningaasarsiorneq nungusaataanngitsumillu ineriartortitsineq”. Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq aamma Aningaasaqarnermut aamma Aatsitassanut Ikummatissanullu Naalakkersuisoq Andreas Uldum isumasioqatigiinnermi pingaarnertut oqalugiartuupput.

Vittus Qujaukitsoq isumasioqatigiinnermi peqataanermi saniatigut Bruxelles-mi ataatsimeeqattaarpoq, EU-p puisit amii pillugit peqqussutaa annermik sammillugu.

Vittus Qujaukitsup ataatsimiinnerni taakkunani pingaartillugu saqqummiuppaa puisit amiinit nioqqutinik inerteqquteqarnerup Kalaallit Nunaannut ajortumik sunniutai, naak Inuit pillugit immikkut isumaqatigiittoqaraluartoq. Vittus Qujaukitsoq qinnuiginnippoq EU-p qulakkiissagaa puisit amii pillugit peqqussutikkut nutaakkut anguniarneqassasoq kalaallit piniartuisa eqqugaanerat minnerpaatinniarneqassasoq.

Puisit amii pillugit peqqussut nutaaq ulluni makkunani inaarutaasumik isumaqatiginninniutigineqarpoq EU-mi immikkoortortaqarfinni pingasuni – Europaparlamentimi, EU-mi naalagaaffiit ilaasortaasunit kiisalu Europakommissionimi. Oqartussaqarfiit taakku pingasut peqqussummik inaarutaasumik missingiusiornissaat ulluni qaninnerni naatsorsuutigineqarpoq, taannalu naalagaaffinnit ilaasortaasunit juunip 30-iani aalajangiiffigineqassaaq Europaparlamentimullu ukiaru taasissutigineqartussanngorlugu saqqummiunneqassalluni.

EU-mi nunat sinniisuutitaqarfii Vittus Qujaukitsup taamaammat juunip 23-iani 24-ianilu ataatsimeeqatigisaqattaarpai, ilaatigut nuna siulittaasuutitaqarfiusoq Letland, kiisalu Danmarkimit, Finlandimit aamma Sverigemit sinniisut ilanngullugit. Vittus Qujaukitsup aamma ataatsimeeqatigaa Ineriartortitsinermut kommissærimut kabinetchef Neven Mimica, taanna Kalaallit Nunaata EU-mut isumaqatigiissutaanut pingaarnertut akisussaasuuvoq.


Paasissutissat sukumiinerusut uunga attaveqarnikkut pissarsiarineqarsinnaapput:
Amalie Jessen, Mobil nr.: + 299 34 53 04