GUX pilluarit

Billede af det Grønlandske flag Ukioq manna ilinniarnertuunngortut GUX-imi ilinniartutut siullertut imminnut taasinnaapput. 2012-imi ilinniarnertuunngorniarfimmik aaqqissusseqqinnerup kinguneranik taaguutigaa Ilinniarnertuunngorniarfik, pingaarnertullu siunertaalluni ilinniartut amerlanerit pitsaanerusumik ilinniagaqartinniarlugit ilinniartitaanerup ineriartortinneqarnerata qulakkeerneqarnissaa.

Inuusuttut amerlanerit ilinnigaqarnissaasa nunatsinnut qanoq pingaaruteqassusia taamaalillunilu inuusuttut ilinniarnerminnik ingerlatsiinnarnissaasa naammassinninnissaasalu pingaaruteqassusiat ataqqillugit, ilinniarnertuunngorniarfiit immikkoortuni marlunni suliniuteqarnerisa malunnartinneqarnissaa Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup, Nivi Olsenip, kissaatigaa: ”Ilinniartunik amerlanernik takkutsitsisarneq” aamma ”Ilinniartunik amerlanernik naammassinnitsitsineq”. Taamaammat ilinniarnertuunngorniarfiit taakkunani marlunni pitsaanerpaamik angusaqartut Nivi Olsenip ukiut tamaasa nersornaasertarniarpai. Ilinniarnertuunngorniarfinni soraarummeerluni naammassinermut atatillugu nersornaasiisoqassaaq.

Ilinniarfinnik nersornaasiinermi ilinniartut ilinniakkaminnik aallartitaminnik naammassinnittarnissaannik anguniaqarnermi ilinniartut ilinniakkani inuttullu ineriartortinneqarnissaat, unammilligassaqartilernissaat tapersersorneqarnissaallu anguniarlugu ilinniarfiit annertuumik pingaaruteqartumillu inissisimanerisa ataqqineqarnissaa isiginiarneqarnissaalu Nivi Olsenip kissaatigaa.

”Ilinniagaqarnerup ilinniakkallu qaffasinneruleriartornerisa isiginiarneqarnerulernerat ilutigalugu ilinniarfiit, ilinniarnertuunngorniarfiinnaanngitsut, inuiaqatigiinni pingaaruteqaleriartuinnartumik inissisimapput” Nivi Olsen oqarpoq nangillunilu ”Ilinniarfiit: Meeqqat atuarfiat, inuusuttut ingerlaqqillunilu ilinniarfiit igasunik, ilinniartitsisunik, peqqissaasunik il.il. ilinniartitsiinnanngillat, aammali ulluinnarni iliuuseqartarnermikkut ilinniartut inuiaqatigiinni peqataalivinnissaannik ilinniartittarpaat. Ulluinnarni iliuuseqartarnerat ilinniarnermik naammassititsisarput. Sinaakkut tamanna kulturilu iliuutsinik kinguneqartitsisut ilinniarfiit pilersikkiartorpaat. Ilinniarfiit, uani ilinniarnertuunngorniarfiit eqqarsaatigalugit, ilinniartuminnik pitsaanerpaamik sinaakkusiiniarlutik suliniuteqartarput, tamannalu ataqqiniarpara.”

GUX Nuuk, KTI-p ilinniarnertuunngorniarfia unammillertigalugu, ilinniarnertuunngorniarfittut ilinniartut ulluinnarni ilinniartitsinermut takkuttarnissaannik kajumissaasarnermi kaammattuisarnermilu pitsaanerpaamik sinaakkusiisimasutut nalilerneqarluni nersornaammik ”Ilinniartunik amerlanernik takkutsitsisarneq” tunineqarpoq.

GUX Nuuk, uani Campus Kujallep ilinniarnertuunngorniarfia unammillertigalugu, nersornaammik ”Ilinniartunik amerlanernik naammassinnitsitsineq” aamma tunineqarpoq. Ilinniarnertuunngorniarfik ilinniarnertuunngorniarfimmi ilinniartunik amerlanerpaanik naammassinnitsitsisoq nersornaaserneqarpoq.

”Ilinniarnertuunngorniarfiit unammilleqatigeeqaat, neriuppunga nersornaasiisarneq siunissami ingerlaannassasoq, taamaalillunilu ilinniarfiit pingaaruteqartumik inissisimanerat isiginiarneqalissasoq paasineqarlunilu. GUX ilinniartunik siullernik naammassisitsinissinni pilluaritsi – neriuppunga amerlanerit siunissami nalliuttorsiutigisassagigut.”



GUX pillugu uani annertunerusumi paasisaqarit



Inussiarnersumik inuulluaqqusillunga
Jesper V. Nielsen
jvni@nanoq.gl
Toqq/direkte 345623