Kalaallit Nunaat EU-mi - Naalakkersuisut Bruxellesimi seminareqalersut

Kalaallit Nunaata Bruxellesimi Sinniisoqarfia juunip 23-anni seminareqartitsivoq ima qulequtaqartumik: ”Kalaallit Nunaat Issittumi – Aningaasarsiornikkut isertitsivissat amerlisarneqarnissaat nungusaataanngitsumillu ineriartortitsineq.” tamatumalu kingorna inuiattut ullorsiornermut atatillugu ilassinneqatigiissitsisoqarpoq.

Inuussutissarsiornermut, Suliffeqarnermut, Niuernermut Nunanullu allanut Naalak-kersuisoq Vittus Qujaukitsoq aamma Aningaasaqarnermut Aatsitassaqarnermullu Naalakkersuisoq Anda Uldum seminareqarnerup nalaani pingaarnertut oqalugiartuuput. Vittus Qujaukitsup immikkut sammisaraa niuernikkut, inuutissarsiornikkut suliffissaqarnikkullu siuarsaaqataasussamik aningaasaliisarnikkut pe-riarfissat kajuminnarnerusut pilersinneqassasut, kingornatigullu Anda Uldumip oliasiornerup aatsitassarsiornerullu iluani aningaasaliinissamut periarfissat eqqartorlugit.

Vittus Qujaukitsup seminareqarnerup nalaani pingaartillugu eqqaavaa Kalaallit Nunaata pingaartitai EU-p iluani siuarsarneqassasut; ”EU Danmarkip saniatigut niueqatigisartakkatta pingaarnersat ilagaat, Nunatta siunissami aningaasaqarnikkut ineriartorteqqinnissaa eqqarsaatigalugu suleqatigiinnerup pitsanngornissaanut periarfissat suli pitsaasuupput. Taamaammat pissusissamisoorpoq uagut Kalaallit Nunatsinniit EU-mi nunat ilaasortaasut soqutiginninnerunissaat kommissionillu aningaasaliiumanerunissaa sulissutigissagutsigu.”
Andreas Uldumissaaq erseqqissaavoq ” Kalaallit Nunaanni aningaasarsiornikkut isertitsivissat amerlisariaqarput pissusissamisoorporlu pinngortitami pisuussutsivut pingaarnerutissagutsigit. Taamaattoq Nunatsinni aningaasaqarnikkut pissutsit killeqarmata ineriartortitsineq qulakkiissagutsigu avataaniit aningaasaliisussanik pisariaqartitsivugut”.

Seminareqartitsinerup ornigarneqarluaqisup siunertaraa Kalaallit Nunaanni aningaasaliinissamut periarfissarpassuit ilisaritissallugit, unamminarsinnaasullu allat ilisimatitsissutigissallugit. Naalakkersuisut najuuttut saniatigut Nunatsinniit peqataasoqarpoq Inuussutissarsiornermut, Suliffeqarnermut Niuernermullu Pisortaqarfimmiit, Aningaasaqarnermut Pisortaqarfimmiit, Greenland Holdingimiit aamma Sulisitsisut – Grønlands Erhvervimeersuniit. Oqalugiartut periarfissat unamminarsinnaasullu assigiinngiiaartut ilisimatitsissutigaat, suliniutit annertoorsuit iluanni aningaasaliisarnermiit puisinniarnermut puisillu amiinik avammut tunisassiorneq ilanngullugu.

Naggataatigullu seminarimi sammineqarput EUp aningaasaliisarnissamut pilersaa-rusiaa nutaaq annaasaqaratarsinnaagaluarluni aningaasaliisartussaq EUmi ineriartortitsinissaq siunertaralugu pilersinneqarsimasoq. Kalaallit Nunaat EUmut OLT-tut (nunat killeqarfiillu imarpiit avataaniittutut inissisimanini) aqqutigalugu aningaasaateqarfik taanna aningaasaliinissamut pilersaarusiaq aqqutigalugu pissarsi-aqarsinnaatitaavoq.

Seminareqartitsineq naggaserneqarpoq ilasseqatigiinnermik Kalaallit Nunatta inuiattut ullorsiornera nalliussiniarlugu. Hotel Arcticip igasuunera Jeppe Ejvind Nielsen tassunga sassaalliissutissanik aalisakkanik qalerualinnillu Nunatsinneersunik ma-marineqarluartunik piareersaasimavoq Polar Seafoodimit tunissutaasunit. EUmi aqutsisoqarfiit assigiinngiiaaqisut najuukkiartorsimapput, soorlu Europakommissioni, Europaparlamenti aamma ambassadørit, sinniisoqarfiit kattuffeqarfiillu suleqatigisartakkat assigiinngitsut.

Annerusumik paasissutissamik piumasoqaruni saaffissaq; Aallartitaqarfiup ningiua - Repræsentationschef, Lida Skifte Lennert, mobil +32 499 99 9858.