Avatangiisinik mianerinnittunik nersornaasiineq

2015-imi Avatangiisinik Pinngortitamillu Mianerinninneq pillugu Nersornaasiineq tusagassiorfinnut nalunaarut.

Naalakkersuisoq Mala Høy Kúko-p 2015-imi Avatangiisinik Pinngortitamillu Mianerinninneq pillugu Nersornaat ullumi 23. juni 2015 Qaanaami Avanersuup Atuarfianut aamma Nuummi Atuarfik Hans Lynge-mi atuartut 9.A-nut tunniuppai.

Nuummi nersornaasiinermi Atuarfik Hans Lyngemiit atuartut, angajoqqaat, ilinniartitsut atuarfimmilu pisortaq najuupput.

Avanersuup Atuarfia videokkut atassuteqarfigineqarpoq, tassani atuartut, ilinniartitsisut, angajoqqaat atuarfimmilu pisortaq katersuussimasut takuneqarsinnaallutik.  

Avanersuup Atuarfiata Avatangiisinik Pinngortitamillu Mianerinninneq pillugu Nersornaatisinerannut pissutaavoq atuartut ilinniartitsisutillu nunaqqatitik peqataatissimammatigit, sodavandit puukuinik qillertuusanik katersueqqullugit, puukullu Danmarkimut nassiullugit aningaasarsissutigissallugit – taamaaliornermikkut illoqarfitsik saligaatsuutippaat, avatangiisitsinnillu paarseqatigiinnissatsinnik takutitsilluarlutik” Nersornaasiinermi taama oqarpoq Naalakkersuisoq Mala Høy Kúko.

Atuarfik Hans Lyngemi atuartut 9.A-t nersorniarneqarnerannut pissutaavoq, nunat tamalaat akornanni suliniummut suleqataalluarnertik. Suliniut avatangiisit pillugit nunatsinni nunallu tamalaat akornanni ajornartorsiutaasinnaasunik ilisimaarinnilersitsivoq. Majimi Malaysiamiipput avatangiisit pillugit ataatsimeersuarnermut peqataajartorlutik. Angalanissaminnullu namminneq aningaasanik qinnuteqarnikkut allatigullu katersisimapput. Misigisatillu tunngavigalugit atuartut pilersaarutigaat piviusulersaarummik filmiliorniarlutik, kingusinnerusukkut ilinniartitsissutitut atorneqarsinnaasumik.

Avanersuup Atuarfia aamma Atuarfik Hans Lynge tamarmik takussutissaalluarput qanoq klasset fagillu aporfiginagit suleqatigiinneq atuarfinnut, illoqarfinnut, nunatsinnut nunallu akornanni pitsaasunik inerititsisinnaammat. Neriuppungalu ullumi nersornaasikkatta maligassiuinerinut atuarfiit allat isumassarsiorluarsinnaassasut.” Taama Naalakkersuisoq Mala Høy Kúko atuarfinnut tusagassiortunullu oqalugiarnermini oqarpoq.

Namminersorlutik Oqartussat Avatangiisinik Pinngortitamillu Mianerinninneq pillugu Nersornaataat inunnut avatangiisitsinnut pinngortitamullu suliniuteqarluarsimasunut tunniunneqartarpoq. Ukiorlu manna atuarfiit immikkut isiginiarneqarsimapput.

Avanersuup Atuarfia aamma Atuarfik Hans Lynge-mi atuartut 9.A immikkut tamarmik 25.000 kr.-inik akissarsitinneqarput.

Nipaa tusaruk.

Assilisat takukkit.

 

 

Paasisaqarnerorusukkuit, atassuteqarfigiuk Naalakkersuisup allattaa Elise Kuitse, tlf. nr. 551914