Erfalasorput ukiunik 30-liivoq

Erfalasutta pisortatigoortumik 21. juni 1985-imi amoqqaarneraniit ukioq manna ukiunik 30-nngortorsiutigalugu nalliussisinnaavarput. Taamanerniit Erfalasorput atorluarneqalersimavoq ulluinnarni Nunatsinni, illoqarfinni, nunaqarfinni inoqarfinnilu mikinerpaani inuunermi ilaalersimalluni. Pisullu assigiinngitsorpassuit nalliussisissimavavut, pisortatigoortumik inuttullu nammineq, erfalasumaarnitsigullu ”maani immikkut pisoqarneranik” takussutissarisarlutigu.

Erfalasorput kusanaqisoq ukioq manna ukiuni 30-ni erfassimasoq eqqumiitsuliortumit Thue Christiansenimit ilusilersorneqarsimavoq. Erfalasutta affaa qulleq qaqortoq tassaavoq sermersuarmik eqqaasitsisoq. Ammalortup affaa aappalaartuusoq kangerlussuarmut iigartartulimmut ilisarnaataavoq. Ammalortup affaata qaqortup iluliarsuit  sikorsuillu oqariartuuteqarfigai; taannalu aappalaartumi angisuumi alliusumi immamut naleqqussagaasumi sarfarsiataarusaartutut inissinneqarsimavoq.

Erfalasutta kulturitsinnut, oqaatsitsinnut ileqqutsinnullu ilaalluinnartutut kinguaariinnt kingulliunerusunit maanna peroriartortunit isigineqarpoq. Uatsinnut piffissami allami inunngorlutalu peroriartorsimasunut Kalaallit Nunaata namminiileriartorneranut Erfalasorput pingaarutilimmik ersiutaasimavoq.

Taamaammat tulluusimaarutigalugulu nuannaarutigisatsinnik Erfalasorput  nunarsuarmi sumiiffinni amerliartuinnartuni nunat allat erfalasuisa akornanni erfalasaleraluttuinnarpoq. Tamanna Nunatsinni inuiaqatigiinnik pilersissimasatsinnik ataqqinninnermik akuersinermillu aamma uppernarsaataavoq.

Erfalasutta kusanaqisup Inuiattut Ullorsiornitsinni, ukiunilumi amerlasoorpassuarni tulliuttuni, erfalanissaa qilanaarivarput.

Sapaatiuppat ullortunermi Inuiattut Ullorsiussaagut, nunarput inuiaassuserpullu nalliuttorsiutigissallutigu. Taamaammat Naalakkersuisut sinnerlugit innuttaasut Inuiattut Ullorsiorluarnisaannik kissaappakka.

 

Kim Kielsen,
Naalakkersuisut Siulittaasuat