Naalakkersuisoq nunani tamalaani ataatsimeeqataavoq

Naalakkersuisoq Mala Høy Kúko nunani tamalaani nukissiuuteqarnermut ministerit ataatsimiinnerini ataatsimeeqataavoq.
Mala Høy Kúko, Pinngortitamut, Avatangiisinut Inatsisinillu Atuutsitsinermut Naalakkersuisoq, marlunngormat pingasunngormallu nukissiuuteqarnermut ministerit Bruxellesimi ataatsimiinneranni nunani Imarpiup illuatungaaniittuni nunallu immikkoortuini (OLT) ministereqatini ataatsimeeqatigai. Nunani OLT-mut ilaasortaasuni mingutsitsinngitsumik nukissiuuteqarnerup ineriartortinneqarnissaanut siunertaqarnermik nalunaarut tamatumunnga atatillugu nukissiuuteqarnermut ministerinit atsiorneqarpoq.

”Kalaallit Nunaanni mingutsitsinngitsunik nukissiuuteqarneq annertuumik aningaasaliiffiusarpoq. Innaallagissiatta 60 procentiata missaa nukissiuutinit mingutsitsinngitsunit pissarsiarisarparput. Tamatumani uuliamik eqqussisarnermik pinngitsuuisinnaanerput annikillisipparput, tamannalu silap pissusaanut avatangiisinullu pitsaasuuvoq”, Naalakkersuisoq Mala Høy Kúko Bruxellesimit oqarpoq, tassanilu nunani OLT-mut ilaasortaasuni nukissiuutinik mingutsitsinngitsunik ineriartortitsinissamut siunertaqarnermik nalunaarummut atsioqqammerpoq.

Ataatsimiinnermi qulequttanut immikkoortoq ”Nukissiuutinik mingutsitsinngitsunik suliniuteqarneq – nunanit kiattuniit qalasersuarnut” Nunat OLT-mut ilaasortaasut 22-iusut Manerassuarmiit Karibiap Imartaanut aammalu Imarpiup kujataaniit Imarpiup avannaanut siammarsimapput. Nunat OLT-mut ilaasortaasut inukinnertik, qeqertaanertik aammalu nunanut EU-mut ilaasortaasunut attaveqarnertik ataatsimoorutigaat.

Danskit Europa Parlamentimi ilaasortaatitaat Morten Helveg-Petersen ataatsimiinnermik ammaasuuvoq, Kalaallit Nunaannut qanittumik attaveqarneq suleqateqarnerlu innersuullugu, tassanilu nunat OLT-mut ilaasortaasut nukissiuuteqarnermi suleqatigiinnerisa aammalu nutaaliornermi suleqatigiissinnaanerisa pingaaruteqarnera erseqqissaatigaa.

”Kalaallit Nunaat OLT-mi suleqatigiinnermut nunani issittunit kisiartaalluni peqataalluni pingaarutilitsigut nunanit OLT-mut ilaasortaasunit allanit allaanerugaluartoq suleqatigiinnissaq Kalaallit Nunaannut soqutiginaateqarpoq. Nukissiuutinik mingutsitsinngitsunik atuinermi assigiinnik unammilligassaqarpugut, soorlu nukissiuutinik toqqorterisarnermi, tamakkulu pillugit immitsinnut annertuumik ilinniarfigeqatigiissinnaavugut”, Naalakkersuisoq suleqatigiinneq pillugu oqarpoq.

Nunat OLT-mut ilaasortaasut ilaatigut nukissiuutinik mingutsitsinngitsunik atuinerup ineriartortitsinerullu pitsaanerulernissaa anguniarlugu suleqatigiissapput. Anguniagaqarnermut nalunaarut, nukissiuuteqarnermut ministerit ataatsimiinnerisa inernerisaa nunani OLT-mut ilaasortaasuni nukissiuutinik mingutsitsinngitsunik ineriartortitsinermi suleqatigiinnerup nukittunerulernissaanut aqqutissiuussivoq.

Mingutsitsinngitsunik nukissiuuteqarneq suli Naalakkersuisut pingaartippaat. Pingaartumik erngup nukinga aallunneqarpoq, kisiannili nukissiuutit mingutsitsinngitsut allat aamma misissuiffigineqarput.

Annertunerusumik paasisaqarusunnermi allaffimmi pisortaagallartoq Karen Anne Arleth, knar@nanoq.gl / +45 3030 7254-mut imaluunniit Naalakkersuisup allattaa Elise Uupi Kuitse mailikkut eukl@nanoq.gl / +45 5115 0323-mut attaveqarfigineqassapput.