Suleqatigiissitat nutaat

Suleqatigiissitat nutaat: Siuarsarnerup qulakkeernissaanut siunnersuutitsialaat

Akileraartitsinermut akitsuuteqartitsinermullu aaqqissuussarput pisortanilu aqutsisoqarfik aporfissaatinnagit qanoq siuarsarnermut qulakkiissavarput, aammalu taamaaliornitsigut pisortani aningaasaqarnermik attassisumik qulakkeerissaagut? Qanorlu inuussutissarsiorfimmut siunertarinngisanik kinguneqartitsisunik inatsisiliorneq pinaveersaarniassavarput? Tassaapput Aningaasaqarnermut Naalakkersuisoqarfiup aamma Sulisitsisut soqutigisaqaqatigiit allat pingaarutillit aamma suliassaqarfimmi immikkut ilisimasallit peqatigalugit naatsumik oqaatigalugu apeqqutit pingaarnerutitat akiniarsarisassaat.

 
Inatsisiliornermi siunertarinngisamik kinguneqartitsinerit inuussutissarsiorfimmut annertuumik nalilimmik kinguneqarsinnaavoq, suliassiissutitut annaasatut imaluunniit annikinnerusumik isertitaqarnertut ilusilinnik. Taamaattumik akileraartitsinermik akitsuuteqartitsinermillu suliassaqarfimmi inuussutissarsiornermut tunngasutigut inatsisaasunik misissuisussamik, aammalu pisortanik oqaloqateqarnermi suliffeqarfinnut aqutsisoqarnikkut artukkiinerup oqilisarnissaanik periarfissanik misissuisussamik suleqatigiissitamik sulingasuartussamik pilersitsisoqassaaq.

Suleriaasissaq allaanerussaaq. Anguniagaq tassaanngiaq sammisaq pillugu suleqatigiissitaq quppernikkaamik nalunaarusiamik tunniussaqassasoq. Paarlattuanik 2015-imi siunnersuutinik piviusunik imaqartitamik katalogimik saqqummiussaqassaaq, ilaatigut 2016-imi ukiunilu takkuttussani inatsisinik nutaanik piareersaassutsit pitsanngorsarnissaannut toqqaannartumik ilapittuisinnaasunik, ilaatigullu Aningaasaqarnermut Aatsitassaqarnermullu Naalakkersuisoqarfiup suliassaqarfiani siunertamut tulluarnerusumik aqutsisoqarnissamut aqqutissiuussisinnaasumik.

Aningaasaqarnermut Naalakkersuisoqarfimmit aamma Sulisitsisunit sinniisuutitat saniatigut suleqatigiit inunnik inuussutissarsiorfimmi inatsisaasunik aningaasaqarnermillu pissutsinik immikkut ittumik suliatigut ilisimasaqartunik, soorlu inatsisilerituunik aamma kukkunersiuisartunik ilalerneqartuartassaaq. Pingaaruteqalissappallu SIK kattuffiillu allat aamma ilanngunneqassappat, soorlulusooq pisariaqartitsineq naapertorlugu naalakkersuisoqarfiit pingaarutillit allat aamma ilanngunneqartassallutik.
”Inunnit ilisimannittunit, ”kissartuusunik maluginnissinnaasutut” oqaatigineqarsinnaasunik, inuussutissarsiorfimmi susoqarneq pillugu ilisimasalinnik piviusunik siunnersuutit pisariaqartippagut. Siunnersuutit maannakkorpiaq inatsisiliornermik suliaqarnermi atorsinnaasagut, atuarneqaratik pujoralammik katersuiinnartut nalunaarusiat pinnagit”, Aningaasaqarnermut Aatsitassaqarnermullu Naalakkersuisumit Anda Uldumimit erseqqissumik oqaatigineqarpoq, qularutiginngilaalu inuussutissarsiorfimmi sinniisuutitat aaqqissuussinermik siunissamut tunngatitami ilorraap tungaanut ilapittuuteqassaneri, taamaalilluta inatsisiliornitsinni siunertarinngisanik kinguneqartitsinerit pinaveersaassagatsigit.

”Piviusumik iliorfigineranut naleqqiullugu suleqatigiinnissap oqaluuserinera pisariunnginneruvoq, maannakkulli suleqatigiissitaliornitsigut iliuuseqarfigilerparput, inuussutissarsiornermilu politikkikkut sammineqartunut kinguneqarluartussamik siunnersuutinik pilersuinissarput qilanaaraarput. Suliffitsinni ilisimasarpassuaqarpoq inatsisiliornermi atorneqarsinnaasunik. Pilersitaq nutaaq aqqutigalugu sakkumik atorsinnaasamik pissarsissaagut, ilaatigut suleqatigiinnerup ingerlassami siusinnerusumut inissimmatigut, taamaalillutik suliffeqarfiit isiginnaartuuinnartutut suliap kingornaniikkunnaassallutik. Tamannalu qujamasuutigaarput”, Sulisitsisuni pisortaq Brian Buus Pedersen oqarpoq.

Suleqatigiinni avataanit peqataasut suliaminnut akissarsiaqassanngillat, allaffissornermullu tunngatillugu sullissineq Aningaasaqarnermut Naalakkersuisoqarfiup aningaasaqarnermigut sinaakkutigisaasa iluaniissaaq.

Allattoq Anda Uldum, Aningaasaqarnermut Aatsitassaqarnermullu Naalakkersuisoq (Demokraatit)

Brian Buus Pedersen, Sulisitsisuni pisortaq

Annertunerusumik paasisaqarusunnermi

Martin Christiansen, mobil: 221533