Nunat avannaamioqatigiit isumasioqatigiinnerat

”Suiaassuseq, ilinniartitaaneq inuillu nuuttarnerat”

Ulloq 17. juni Nunat Avannaamioqatigiit nuummi isumasioqatigiissapput, sammineqassallutik inuiaqatigiittut aaqqissugaanitsinni kipungasumik inissisimalersismasut qanoq aaqqissuussivigineqarsinnaanersut. Tassunga aallaaviuvoq arnat amerliartuinnartut inoqarfinniit illoqarfinnut annerusunut ilinniariarlutik suliartorlutilluunniit nuuttarnerat annertusiartuinnarmat.

Arnat suli amerliartuinnartut illoqarfinnut annerusunut atuariarlutik atorfinillutilluunniit nuuttarput. Assersuutigalugu  ilinniarfiit ingerlaqqiffiusartunut isertartut 70%-iisa misserluinnaat arnaapput. Tamannalu ilutigalugu angutit ineriartornikkut  unittoortartut amerliartuinnarlutik, ilinniagaqalertartut ikippallaarneri pissutigalugit. Suliffiillu angutinik suliffigikkajunneqartartut ilinniarsimassutsimik piumasaqaatitaqanngitsut ikiliartuinnarlutik, pingaartumik nunaqarfinni. Tamanna inuiaqatigiinni ikittunnguani suiaassutsikkut inissisimanikkut kipungalersitsivoq, inuiaqatigiittullu ineriartoqqinnissamut ulorianartorsiortitsilluni.

Isumasioqatigiinnerup matuma sammissavaa ajornartorsiutip tamatuma qanoq qaangerniarneqarsinnaanera, nunatsinniinnaanngitsoq nunanili avannarlerni tamani sumiiffinni amerlasuuni. Oqalugiartoqartassaaq, eqimattani suleqatigiissitaliortoqartassaaq ilinniartitaaneq, nuttarneq kiisalu sulisartoqarnerup allanngorsimanera, taamatuttaarlu iliuusissanik pilersaarusiorluni aaqqiissutissanik sammisaqartoqassalluni. 

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen isumasioqatigiinneq ammarlugu oqalugiassaaq, imalu oqaaseqarpoq; ” Qujanarpoq arnat ilinniagaqalertarmata atorfinillutillu. Taamaattorli pingaaruteqarpoq angutit ineriartornikkut unittuunnginnissaat. Taamaammat ajornartorsiutip matuma sammineqarnera pitsaasuuvoq”.

Nunanit Avannarlernit tamanit inuit 50-it isumasioqatigiinnermut peqataassapput, qallunaat nunaanni Ministeriet for Børn, Ligestilling, Integration og Sociale Forhold; kiisalu Ilaqutariinnermut, Naligiissitaanermut Isumaginninnermullu Naalakkersuisoqarfik suleqatigiillutik isumasioqatigiissitsipput, qallunaat nunaata Nunani Avannarlerni Suleqatigiissitani siulittaasuunerannut atatillugu.

Isumasioqatigiinnerup ilutigisaanik saqqummersitsisoqarnikuuvoq ”Sumiiffik, Naligiinneq/ -(nnginneq) suiaassuserlu- Saqqummersitami erseqqissarneqarpoq nunani avannarlerni tamani avinngarusimanerusuniittuni sammisamut unammilligassat; kiisalu best practices suiaassutsinut tunngatillugu, ilinniagaqarnernut tunngatillugu kiisalu nuttarneq. Saqqummersitaq EDGE Aalborg Universitet-imit saqqummersinneqarpoq kingornalu tamanit pissarsiarineqarsinnaalerumaarluni.

 

Annertunerusumik paasisaqarusukkuit attavissaq: Niels Thomas Andersen, oqar. 34 53 39, e-mail nita@nanoq.gl