Kultureqarnermut Naalakkersuisoq tusagassiutinut ulloqartitsisoq

Naalakkersuisup Nivi Olsen-ip ataasinngornermi 15. juni 2015 tusagassiornermik ingerlataqartut assigiinngitsut ataatsimeeqatigiinnermut tikilluaqquai, kalaallit tusagassiutaat pillugit oqallinnissamut, aammalu tusagassiutit assigiinngitsut, kingullermik tusagassiuteqarneq pillugu nassuiaammik 2010-imi saqqummiussaqartoqarnerata kingorna, ineriartorsimanerat pillugu.

Ataatsimeeqatigiinnermi ulloq naallugu ingerlanneqartumi pingaarnertut siunertarineqarpoq tusagassiorfiit periarfissinnissaannik nassuiaateqarnissamut tusagassiornermik ingerlatsinermi unammilligassat pillugit, tamatumani minnerunngitsumik qaammarsaaviginiarlugit suliniutit pilersinneqarsinnaasut, tusagassiuteqarnerup nukittunerusumik inissisimalersinnaaneranut.  

Oqallinneq aallaaveqarpoq saqqummiussinernik apeqqutinillu tusagassiornermi soqutigisaqartut assigiinngitsut saqqummiussaannik, tusagassiorfinni ullumikkut pissusiviusut ukiunilu aggersuni pissusiulertussat eqqarsaatigalugit, tamatumani aamma atortorissaarutinut oqaatsinut aammalu ilinniartitaanerni unammilligassanut tunngatillugu, soorluttaaq oqallinneq immikkut aningaasaliissutinik tulleriaarinissamut tunngasumik sammiveqartoq. Tulleriiaarinissamut tunngasumik oqallinneq ilaatigut isiginiarneqassaaq nassuiaasiami ukiunik tallimanik pisoqaassusilimmi tulleriiaarisoqarsimannginneranik, tamannalu ullutsinni aningaasaqarnikkut unammilligassanut tunngatinneqarluni.

KNR-ip ullumikkut inissisimanerata saqqummiunneqarnerata saniatigut, aamma najukkani radioqarfiit TV-qarfiit aammalu aviisit nuna tamakkerlugu saqqummersartut atugaat nassuiaateqarfigineqarput. Tamatumalu saniatigut Oqaasileriffimmiit kalaallisut oqaatsitta tusagassiutini atugaanerat nassuiaateqarfigineqarpoq, soorluli aamma tusagassiortut peqatigiiffianniit tusagassiortunut atugassarititaasut nassuiarneqartut, aammalu Tusagassiortunngorniarnermik ilinniarfiup pisortaata ullumikkut ilinniartitaaneq sammigaa, ilinniakkallu tusagassiornermi inuiaqatigiinnilu ullumikkut qanoq inissisimanera aamma sammineqartoq.

Ataatsimeeqatigiinnermi aamma tusagassiutinut naqitanut tapiissuteqartarnermut tunngasumik apeqqut eqqartorneqarpoq, soorluttaaq KNR pilerisaarutitaqanngitsoq oqallinnermi aamma sammineqartoq.

Tamatumunngalu atatillugu aamma aviisini pilerisaarutinik atuisarnerup annertunerulersinnaaneranut apeqqut qaqinneqarpoq, inatsisissatut siunnersuut aqqutigalugu ingerlataqartunut assigiinngitsunut periarfissaalersussat eqqarsaatigalugit.

Tusagassiutit ulluat aamma Naalakkersuisunut ilaasortamut periarfissatsialaavoq qaninnerpaamik paasisaqarfigissallugit tusarnaassallugillu tusagassiutini sulisut namminneq isumaliutersuutaat, aamma siunissami tusagassiuteqarnikkut atugassarititaalertussanut atatillugu.

Annertunerusumik paasisaqarusukkaanni Karl Davidsen attavigineqarsinnaavoq oqarasuaammi +299 34 56 91.