Eqqaamalaariaruk qimmit aasami aamma qilalertaqimmata

- Qimmeqarpoq aasat tamarluinnaasa qilalerlutik perlerlutillu toqusartunik. Taamaattumik pisariaqarluinnarpoq qimmit ullut tamaasa imertittarnissaat, uumasut nakorsaat Sanne Eline Wennerberg, Ilulissat, oqarpoq.

Avannaani qimmiutillit ilaat uumasunik illersuineq pillugu inatsimmik unioqqutitsilluinnarsimasut aasat tamaasa naammattoorneqartarput, qimmiminnik paarsinerluttutut naammattoorneqarlutik.
Qimmit toqungasut naammattoorneqarsinnaasarput. Qimmit sanigorsimalluinnartut naalliutseqqunagit allatut ajortumik aamma toquinnartariaqartarlutik.
- Qimmilimmut qimminut piffissangaatsiarsuaq atorneqartarpoq. Inuit paasisinnaalluarpakka sunngiffeqarusunnerusarmata, piniartarmata aasaaneraniluunniit eqqissillutik angalaarniarnerusarmata, qimmiminnik ullut tamaasa paarsinissartik nerisitsinatilluunniit salliutinnguarnagu. Qimmeqarluniliuna qimmit aamma isumagineqarluartarnissaat pisariaqartoq, uumasut nakorsaat Sanne Eline Wennerberg erseqqissaavoq.

Ilulissani Nukissiorfiit qimmeqarfiit eqqaanni imermut tankinut, qimmit imissaannik, ukiuni arlaqalersuni immiisarput.
Kommunip ingerlatsiviata immikkoortortaa ukioq manna aamma taamaaliussalluni sulissuteqarpoq.
- Pitsaalluinnarpoq kommune qimmit pitsaasumik atugassaqartikkusullugit iliuuseqarmat. Taamaakkaluartoq qimmiutillip qimmiminut ullut tamaasa nerisitsinissani imertitsinissanilu akisussaaffigisussaavai, uumasut nakorsaat erseqqissaavoq.

Paasissutissat
Qimmip 30 kiilunik oqimaassusillip imeq ullormut pisariaqartitaa 2-3 literiusarpoq.
Qimmit imertinneqarneq ajortut ullut arlaqanngitsut qaangiukkaangata toqusarput.

Attavigineqarsinnaavoq: Uumasut nakorsaat Sanne Eline Wennerberg. Mail: sawe@nanoq.gl