2018-imut kommuninut naligiissaarineq pillugu isumajunnaarneq

Siunissami kommunit ilusissaat pillugu nalornineq. Paasissutissanik tunngavigisassat amigaatigineri, assigiinngitsunillu naatsorsuutinik allattueriaatsit nalunaarsueriaatsillu. Apeqqutit paasineqanngitsut sisamat, piffissami matumani ataavartussamik naligiissaarisitsisinnaanngitsut. Tulliatigullu ilusissamik aalajangersimasumik ataatsimik aqutsisoqarfiusumi isumaqatigiittoqarsinnaasimanngilaq.

”Ajornartorsiut tassaavoq paasissutissanik tunngavigisakinneq najoqqutassanik tatiginartunik ikippallaanik nassataqartitsinera, taamaalilluni naligiissaarinermik aaqqissuussaasup qanoq isikkoqarnissaa taamungaannaavallaassaaq”, Naalakkersuisut sinnerlugit Aningaasaqarnermut Naalakkersuisoq Anda Uldum nassuiaavoq, erseqqissarpaalu suliaq pingaarpallaartoq najoqqutassanut taama ikitsigisunut aalajangiussiffiunissaanut.

Taamaattumik siunnersuutertik utertissallugu Naalakkersuisut aalajangiuppaat, piffissamullu 2016-imit 2018-imut naligiissaarigallarnermik nutaamik saqqummiussaqarlutik.

Naligiissaarigallarnermiipput: Ukiut tamaasa ukiuni taakkunani pingasuni Kommuneqarfik Sermersooq kommunit sinnerinut pingasunut koruuninik 45 millioninik akiliisassaaq, Qaasuitsup Kommunia koruunit 25 millionit pisassallugit, aammalu Kommuneq Kujalleq aamma Qeqqata Kommunia koruunik 15 aamma 5 millioninik pisassallutik. Koruuninut millionerpassuarnut agguaasseriaase kommunit aningaasartuuteqarnerpaat aningaasanik amerlanerpaanik aamma pisarnissaannik najoqqutaq aallaavigalugu pivoq.

”Kommunit sianigalugit Naalakkersuisut isumartik piaartumik nalunaarutiginissaa aalajangiussimavaat. Taamaalilluta kommunit sulinissaannut inissaqarfilerpagut, taamaalillutik ukiup tullissaanut missingersuutissap eqqissillutik pilersaarusiorsinnaalissallugu”, Anda Uldum oqarpoq.

Ukiuni takkuttussani Namminersorlutik Oqartussat aamma kommunit suliaqartut arlallit peqatigalugit, ilanngullugu Naatsorsueqqissaartarfik paasissutissanik tunngavissanik pitsaanerusunik pilersitsiniarlutik aaqqissuussaasumik anguniaqartumillu sulissutiginnissapput, najoqqutassanik pingaarutilinnik amerlanernik tassani nassaarinninniarlutik 2019 aallartiffigalugu naligiissaarinermi nutaami ataavartussami ilaasinnaasunik. Suliarisami aamma aaqqissuussiviit naligiissaarinermik suliaqarnissamut paasisutissanik tunngavissanik iluartunik pissarsisinnaasitsinngitsut pingaarnersiugaassapput.

Isumaqarpunga pissutsit atukkagut aallaavigissagutsigit aaqqissuussineq pitsaallunilu naleqquttuusoq. Qanorlu tunngavigisassamik torerlunilu pissusissamisoortumik naligiissitsinerup aallaaveqarnissaata qanoq qulakkeernissaa pillugu oqallinnerit nanginnissaat assupilussuaq iluarisimaarpara”, Aningaasaqarnermut Naalakkersuisoq isummerpoq, ilisimatitsissutigaalu siunissami kommunit ilusissaat paasineqarpat siunissami naligiissaarinerup oqallisigineranut tamanna ilaatinneqassasoq.

Anda Uldum naapertorlugu naligiissitsinerugallartoq pillugu kommunit sisamat ilisimatinneqarsimapput.

Inussiarnersumik inuulluaqqusillunga

Anda Uldum, Naalakkersuisoq for Finanser og Råstoffer

 

Yderligere information: Kontakt pressekoordinator Martin Christiansen, mobil: 221533