Pisortaq nutaaq

Oqaasileriffimmi 1. juni 2015 aallarnerfigalugu pisortaq nutaaq

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup nuannaarutigalugu nalunaarutigissavaa Oqaasileriffimmi pisortaq nutaaq maanna sulilersimammat. Katti Frederiksenip taarserpaa Oqaasileriffimmi pisortaasoq siulleq Carl Christian Olsen 2014-ip naanerani soraarninngortoq.

Katti Frederiksen Narsami inunngorlunilu peroriartorpoq, pingasunik meeraqarpoq, Klaus Møllerilu uigalugu. Katti ilinniarluarsimasuuvoq, inuussutissarsiornermilu misilittagaqarluarluni,  aammalu oqaatsinut tunngasunik atuakkialerinerullu silarsuaani nunani avannarlerni issittumilu siammasissumik attaveqalersimalluni.

Katti Frederiksen Ilisimatusarfimmi Oqaasilerinermi, Atuakkialerinermi Tusagassiuutilerinermilu ilinniagartuutut cand. mag.-itut 2011-imi naammassivoq, tamatumalu saniatigut University of Fairbanksimi Alaskamiittumi semesteri ataaseq ilinniarsimalluni. Ilinniagartuutullu ilinniagaqarnermi saniatigut aamma Nordisk Sprogkoordinationimi Dansk Sprognævnip allattoqarfiani  paarlaasseqatigiinnermik aaqqissuussinermi ilinniariartorsimalluni ilisimatusarsimallunilu, tassanilu Nunani Avannarlerni oqaasilerinermi suleriaatsinik sulianillu pingaartitanik suliaqarsimalluni.

Katti Frederiksen 2008-miilli Oqaasileriffimmi AC-fuldmægtigitut atorfeqarsimavoq, tassanilu ilinniagartuutut Oqaasiliortunut allatsitut 2008-miit sulisimalluni, ilinniagartuutullu Oqaasiliortunut allatsitut sulianillu ingerlatsisutut kalaallit oqaasiinik atuinerup nikikkiartornera ineriartorneralu  malinnaaffigisimallugu.

Katti Frederiksen oqaatsit sannaannut qanorlu atorneqartarnerannut ilisimasassanik annertuunik ilaatigut University of Alaskami katersisimavoq, qilanaaralugulu Oqaasiliortunik oqaatsinullu ataatsimiititanik allanik oqaloqateqartarnissani isumasioqateqartarnissanilu,  kiisalu oqaatsinik atuinermut teknikikkut iluaqutissanut siunnersorneqarneq aamma oqalutsinik nutserisunillu oqalliseqateqartarnissaq.

Katti Frederiksen nunarsuarmioqatigiinni ingerlatsinermut misilittakkani tunngavigalugit, aammalu ilinniagartuutut tunuliaqutarisani aallaavigalugit, oqaatsitta avammut sinniisuuffiginissaannut piginnaaneqarluarpoq.

Sunngiffimmini Katti taalliaminik kiisalu meeqqanut atuakkiaminik saqqummersitsinikuuvoq, soorluttaaq timersornermik ingerlatsilluartuusoq arpannerlu  aallutarilluartuullugu.