Partiit oqaloqatigiinnissanut qaaqqusaapput

2016-imut Aningaasanut Inatsit: Partiit oqaloqatigiinnissanut qaaqqusaapput

2015-imut Aningaasanut Inatsit inissereerpoq, maannalu 2016-imut Aningaasanut Inatsit aallartipparput. Ukiup tullissaanut aningaasanut inatsimmut tunngavigisaq ukiormannatuulli ippoq. Naatsumik oqaatigalugu sakkortuumik pingaarnersiuilluni tassaassaaq aningaasanut inatsit sukangasoq – saniatigulli attaveqarfinni kollegianilu aningaasaliinissanut inissaqartitsisoqassaaq. Nunamulli aningaasaqarnermi unammillerfissat tassunga uninngillat.

2016-imi naalagaaffimmit tapiissutit Danmarkimi akit appasinnerisa aningaasarsianillu naleqqussaanerup nassatarisaanik taamaallaat koruunit 3,7 millioninik qaffanneqassapput. Uagulli 2016-imut Aningaasanut Inatsisissatut siunnersuummi ingerlatsinermut tapiissutinullu aningaasaliissutit akiinik aningaasarsianillu naleqqussarnerinut koruunit 55 millionit atorpagut. Tamatumunnga patsisaasoq tassaavoq Danmarkimut naleqqiullugu uagutsinni aningaasat nalikilliartornerisa sukkanerunerat, ilaatigut isumaqatigiissut akisooq pisuulluni. Tamanna koruunit 50 millionit sinnilaarlugit assigiinngissuteqartitsivoq.

Tulliatut 2016-imut aningaasanut inatsimmi koruunit 88,5 millionit, tassaasut isertitat aningaasartuutillu akornanni oqimaaqatigiissitsiniarnermut assigiinngissutaasut nassaarineqassapput. Tamakkerlugit nassataraat aningaasaliinissamut koruuninik 140 millioningajannik pisariaqartitsisoqarnera.

Ilanngutissaarlu Inatsisartuni partiit suleqatigalugit unammillerfissap ataatsimoorussap annertuup Naalakkersuisut iluarsiiviginiagassaat. Oqaloqatiginninnissat aallartinniarlugit 2016-imut Aningaasanut Inatsit kisiat oqaluuserisassanngorlugu sapaatip akunnerata tulliani aallarniutitut ataatsimeeqatigiinnernut partiit tamassa qaaqquakka. Qaaqqusissutit nassiussorneqareerput.

”Sipaarutaasussat aningaasarpassuupput, Naalakkersuisulli anguniagaat ersarissuuvoq. 2018-imi aningaasaqarnermi oqimaaqatigiittoqarnissaanik anguniagaq attapparput. Taamaattumik ilallugu sakkortusuumik pingaarnersiuinissarput sanioqqussinnaanngilarput, siunissami atugarissaarnitta inissisimaffia attatiinnarlugulu aningaasaliinitsinnut aningaasaqarnikkut iliuuseqarfissanik pilersitsissagutta”, Anda Uldum, Aningaasaqarnermut Naalakkersuisoq taama oqarpoq, tamannalu ilutigalugu Inatsisartuni ilaasortanut kaammattuivoq siunnersuutigisinnaasaat aningaasartuutissanik piumasaqartussat partiimik aningaasaqarnermik oqaaseqartartuinut nassiuttassagaat, taamaalillutik aningaasanut inatsisissaq isumaqatiginninniutaalerpat pingaarnersiukkanut tamarmiusunut ilanngunneqarsinnaalersillugit. Nangipporlu:

”Paarlattuanik aningaasartuutitsinnik ikilisaasunik imaluunniit isertitanik annertusaasunik Inatsisartuni ilaasortat siunnersuuteqarnissaannik kaammattuiffigaakka.”

2016-imut aningaasanut inatsisissatut siunnersuummut periuseqarneq siulianut assingussaaq – tassalu partiillu oqaloqatigiilluni ataatsimeeqatigiittarnerit, ataatsimoorluni Aningaasanut Inatsit pillugu isumaqatiginninniartoqarluni.

”Partiillu qanimut oqaloqateqarnissaq pingaartuuvoq, taamaalillutami ataatsimoorluta aningaasaatigut pingaarnersiuinermi ataatsimoortitami, akimuisumi pingaarnersiugaasumilu ilaanissaannik pingaartitsiniaaneq ataatsimoorussamik paasinniffiunissaa pilersinniarparput.”

2016-imut Aningaasanut Inatsisissatut inaarutaasumik siunnersuutigisaq aggustip qaammataata qeqqani tamanut saqqummiunneqassasoq naatsorsuutigineqarpoq.

 

Inussiarnersumik inuulluaqqusillunga    

Anda Uldum, Aningaasaqarnermut Naalakkersuisoq, Demokraatit

 

Attavissaq: pressekoordinator Martin Christiansen, mobil: 221533