Suliassanik kommuninut nussuineq sukkatsittariaqarpoq

Pisortat suliassaqarfiinik aaqqissuusseqqinnerup atuutilersinneqarneranit ukiut arfinillit ingerlareerneranni nalilersuineq ingerlanneqaleruttorpoq. Nalilersuinermi peqataasunut siuttuupput Naalakkersuisuni ilaasortat tamarmiusut, borgmesterit tamarmiusut, kommunit kattuffiat KANUKOKA aammalu nunaqarfimmiut kattuffiat KANUNUPE.

- Pisortat ingerlatsinerisa aaqqissuunneqarnerat allanngortissagutsigu innuttaasunik sullissinerup pitsaassusia pingaaruteqarluinnarpoq. Namminersorlutik Oqartussat kommunilluunniit suliassanik suliarinnittuunersut innuttaasunut annertunerusumik pingaaruteqanngilaq – pingaartoq tassaavoq innuttaasut aki appasinnerpaaq atorlugu pitsaanerpaamik sullinneqarnissaat, Naalakkersuisut siulittaasuat Kim Kielsen aallarniilluni oqarpoq.

KANUKOKA-p siulittaasuata Palle Jerimiassenip saniatigut erseqqissarpaa kommunit kattunneranni ajunngitsunik angusaqartoqarsimanera miserratigineqarsinnaanngitsoq – aammali nassuerutigisariaqartoq suli iluarsisassarpassuaqartugut. Palle Jerimiassenip kommunit tamarmiusut kissaatigisaat aallarniinermini saqqummiuppaa, ilaatigut oqarluni:

 

- 2009-p kingorna suliassaqarfiit  tallimaannaat kommuninut nuunneqarsimapput. Isumaliutissiissut malillugu kommuninut nuuttariaqartut amerlanerujussuugaluarput, allaammi 100-t tungaannut taagorsinnaagaluarpavut.

Palle Jerimiassenip oqarnera Kim Kielsenip assortunngilaa, aallarniinerminimi oqaatigisaanut ilaammat kommuninut suliassaqarfinnik nussuineq sukkatsinniarlugu Namminersorlutik Oqartussat KANUKOKA-lu qaammatikkaartumik naapittalersimasut.

Pisortat suliassaqarfiisa aaqqissuuteqqinnerat 2009-mi atuutilersinneqartoq nalilersorlugu saqqummiinerit oqallinnerillu ingerlanneqartut malunnarsisippaat nutarsaaneq aporfissarpassuaqartoq. Innuttaasut oqartussaaqataanerat innarlerneqarsimasoq arlallit oqaatigigaluaraat aamma isumaqartoqarpoq apeqqut tassaasoq innuttaaqataasut periarfissaminnik pisinnaatitaaffimminnillu ilisimaarinninnerunissaat. Suleqatigiinni sulinermi inuit tamat oqartussaaqataanerat pitsanngorsaaviginissaa peqataasuniit tikkuarneqarpoq.

Innuttaasut ulluinnarni atugarisaminnut toqqaannartumik aalajangeeqataalersinnissaat aaqqiissutissatut pingaarnerpaatut tikkuarneqarpoq.

 

Ataatsimeersuarneq tallimanngornermi 5. juni 2015 naammassineqassaaq.

 

Nuuk, ulloq 5. juni 2015

Kim Kielsen, Naalakkersuisut Siulittaasut

Palle Jerimiassen, KANUKOKA-p siulittaasuat